وسله والو طالبانو د خپل مشر د مرستیال، مولوي سراج الدین حقاني نوی غږیز پیغام نشر کړ. یاد غږیز پیغام چې په پلازمینه کابل کې د وروستیو پېښو د وضاحت په اړه نشر شوی دی، شاوخوا ۱۱ دقیقې دی.
پیغام کې له لومړنیو خبرو وروسته، مولوي سراج الدین حقاني د کابل او هرات د وروستیو پېښو په اړه خبرې کوي، نوموړی وايي چې موږ د کابل په وزیر اکبر خان، د جنازې په مراسمو او د هرات په جامع مسجد کې چاودنې په کلکه غندلې دي او هېڅکله به داسې کار ونکړي چې ملکي وګړو ته پکې تلفات واوړي.
مولوي سراج الدین حقاني وايي، هر کله چې د دوی له لورې په تېروتنې سره ملکي وګړو ته تلفات اوښتي دوی بښنه غوښتې ده او د تعزیت لپاره یې ځانګړي کسان ټاکلي او لېږلې دي.
سراج الدین حقاني زیاتوي چې له اشغالګرو سره یې جګړه د ملت په مټو او مرستې پیل کړې ده. حقاني وايي چې د خلکو د ستونزو د حل لپاره د دوی له لورې بېلا بېل کمیسونونه جوړ شوي دي.
سراج الدین حقاني همدا راز له خلکو غوښتي چې له قومي شخړو او تعصب نه ځان وساتي.
د مولوي سراج الدین حقاني غږیز پیغام لاندې اورېدلئ شئ.
