بهرنيو ځواکونو تر چاودنې وروسته ۳ ملکيان وژلي
(کابل ټکی کام ۱۳۹۶غبرګولی ۲۲) الماس خدرخېل
ياده پېښه تيره شپه د ننګرهار ولايت په غني خيلو ولسوالۍ کې وروسته له هغې رامنځته شوه کله چې په سيمه کې طالبانو پر امريکايي ځواکونو په ځمکه کې د خښ شوي ماين پر مټ چاودنه وکړه.
د دغه ولايت د والي وياند عطاء الله خوګياڼي رسنيو ته وويل، چې د يادې ولسوالۍ د (شيرګړ) سيمه کې لومړی د بهرنيو ځواکونو په موټر د ماين چاودنه وشوه او بيا وروسته دغه ځواکونو ډزې وکړې.
نوموړی وايي، بهرنيو ځواکونو ته د ور اوښتو تلفاتو په اړه معلومات نه لري، خو د دوی په ډزو درې ولسي وګړي په شهادت رسېدلي دي.
يوې سيمه ييزې سرچينې زياته ويلي، په دغه بريد کې د ګنډيري په نوم یو کس او د هغه دوه زامن وژل شوي چې د وژل شوو زامنو عمرونه له ١٥ کلونو کم دي.
بهرنيو ځواکونو تر اوسه په دې اړه څه نه دي ويلي.
پر بهرنيانو د چاودنې مسئوليت طالبانو په غاړه اخيستی او ويلي يې دي چې په دغه چاودنه کې يې پنځه امريکايي پوځيان وژلي دي.
