(کابل ټکی کام ۱۳۹۶غبرګولی ۲۲) الماس خدرخېل
د ګډ حکومت اجرائيه رئيس ډاکتر عبدالله وايي، دا منو چې په حکومتوالۍ او په امنیت راوستلو کې پاتې راغلي دي.
ډاکټر عبدالله نن د وزيرا شورا په غونډه کې د خبرو پر مهال وويل، چې د ملي يووالي حکومت په خپلو کارونو کې پاتې راغلی او په دې بايد اعتراف وکړو.
نوموړي وايي، په دندو او خلکو ته د خدمت کولو هغه څه مو ونه کړل چې د افغانستان د خلکو اړتيا وه او بايد کړي مو وای.
هغه زياتوي، زمونږ په ګډون د ملي يووالي ټول حکومت په حکومتوالۍ او امنيت کې پاتې راغلی دی.
تردې وړاندې یو شمېر سیاستوالو، سیاسي ګوندونو، مدني فعالانو او عامو خلکو د ملي وحدت حکومت له بې کفایتۍ سخت انتقادونه کړي او دا يې يو ناکام حکومت بللی.
د دوی په وینا د هېواد سیاسي، امنیتي او اقتصادي وضعیت او بهرنی سیاست په ناوړه وضعیت کې دی او بايد لویه جرګه يا ملي اجماع راوبلل شي.
