امريکايي الوتکې د سوريې هوايي ځواک الوتکه نسکوره کړې
(کابل ټکی کام ۱۳۹۶غبرګولی ۲۹) الماس خدرخېل
د راپورونو له مخې، د امريکا يوې جنګي جيټ الوتکې دسوريې د هوايي ځواک يوه جنګي الوتکه هغه مهال رانسکوره کړه، چې د داعش ضد پر وسله والو يې بمونه وغورځول.
د امريکا په مشرۍ نړيوال ائتلاف ويلي، چې امريکايي ايف ۱۸ جيټ الوتکې د سوريې “یو سو ۲۲” ډوله جنګي الوتکه تيره ورځ د رقه ښار په شاوخوا سيمه کې ويشتلې ده.
د سوريې د الوتکې پيلوټ لادرکه دی، ګمان کېږي چې نوموړی به هم وژل شوي وي.
نړيوال ائتلاف وايي، چې دغه الوتکه يې له ځانه د دفاع په خاطر ويشتلې او رانسکوره کړې ده.
په راپور کې ويل شوي، چې د سوري حکومتي الوتکې د دغه هېواد د ډيموکراتیک ځواک پر وسله والو بمباري کوله.
د سوريې پوځ د خپلې الوتکې د ويشتل کېدو خبر تائيد کړی دی خو په دې اړه يې نور جزيات نه دي ورکړي.
تر دې مخکې هم د امريکايي الوتکو په بمباريو کې د سوريې د حکومت عسکر وژل شوي دي.
