(کابل ټکی کام ۱۳۹۶غبرګولی ۲۹) الماس خدرخېل
د ننګرهار ولايت په غني خېلو ولسوالۍ کې تېره شپه افغان او امریکايي ځواکونو عمليات کړي، چې پر مهال يې پنځه ولسي وګړي وژلي او پنځه نور يې له ځان سره وړي دي.
د ننګرهار د والي وياند عطاءالله خوګياڼی وايي، چې ګډو ځواکونو د یادې ولسوالۍ په (سياه چوب) سيمه کې عمليات کړي، چې پر مهال يې پنځه تنه وژل شوي دي.
نوموړی زياتوي، تر اوسه د عملياتو د موخې او پکې د وژل شويو کسانو د هویت په اړه معلومات نه لري.
خو ځايي خلک بيا وايي، چې وژل شوي کسان ټول ولسي وګړي دي چې ګډو ځواکونو په ډزو سره وژلي دي.
د ځايي خلکو په وينا، په وژل شويو کې دوه تنه د يوې ليسې زده کوونکي هم شامل دي.
تر اوسه غوڅ ملاتړ ماموريت په دې اړه څه نه دي ويلي.
د يادونې ده، چې دوه اوونې مخکې هم په ياده ولسوالۍ کې امريکايي ځواکونو د پيشمني پر وخت يو پلار او دوه واړه ځامن په ډزو سره ووژل.
