تبصره
د امريکا پخواني جمهور رئيس، اوباما د خپل حکومت په دوره کې پريکړه وکړه چې تر ٢٠١٤ پورې بايد په افغانستان کې د امريکايي پوځ جګړه ييز ماموريت پاى ته ورسيږي. همغسې وشول او امريکايي پوځ له يادې نېټې وروسته له افغانستانه په تدريجي ډول وتل پيل کړل.
اوس د امريکا نوی حکومت، چې مشري یې ټرمپ کوي، پوځي مشاورين او پوځي جنرالان یې وايي، امريکا په افغانستان کې پاتې کېدو ته اړتيا لري. وايي په افغانستان کې هغه شان حالات نه دې برابر شوي چې ټول پوځ له افغانستانه ووځي، بلکې نور پوځ ته هم اړتيا شته چې افغانستان ته د موجوده ناامنيو د مخنيوي لپاره ولېږل شي.
په افغانستان کې د امریکا او د ناټو د قواوو پخوانی قومندان، جنرال ډیوډ پټرویس د پي بي ایس د تلویزيون سره په مرکې کې ويلي: افغانستان ته د امریکا د زرگونو اضافي عسکرو استول د وخت اړتيا ده، چې که نور پوځ افغانستان ته ونه لېږل شي موجوده ناامني به مهار نه کړل شي.
لکه څرنګه چې جنرال ډیوډ پټرویس ويلي، امريکا په افغانستان کې د پاتې کېدو لپاره همدا ډول پلمو ته اړتيا لري. يو ځل یې چې په افغانستان يرغل کاوه يوه پلمه وه او اوس چې غواړي د افغانستان په بېلابېلو ځايونو کې خپل پوځونه په نهو اډو کې ځای پر ځای وساتي، نورې پلمې ورته ګوري.
په اصل کې افراطيت په افغانستان کې همدې امريکا رامنځ ته کړى دى. امريکا چې له افغانستانه کډې بار کړي افراطيت ورسره خپله کډه کوي، لکه څرنګه چې د روسانو د ایستلو سره د هغوی بړيڅو هم له افغانستانه کډې وکړې، دا رنګه به افراطيت هم د امريکا د ایستلو سره د لوېديځ په لور په کډه شي.
امريکا په افغانستان کې د افراطيت په نامه وخت تېروي، افراطيت د امريکا زيږنده ده. امريکا پر افغان ولس ډول ډول تېری کوي، په يو او بل نامه پرې عمليات کوي، د حکومت د مخالفينو په نامه ولسي وګړي او سيمه ييز پوليس هم وژني؛ ولس مجبور دی چې خپله دفاع وکړي. امريکايي قوماندانان خپلو وحشانه کړنو ته وحشت نه وايي او چې افغان ولس د خپل مال، سر، ناموس او ملي ارزښتونو دفاع کوي افراطيت ورته وايي.
امريکايي جنرالان به آخر د روسانو په څېر په دې اعتراف وکړي، چې پر افغانستان يرغل او بيا په يو او بل نامه پاتې کېدل یې يوه لويه تېروتنه وه، بيا به په خپلو کړنو پښېماني څرګندوي او خپلو کړنو ته به افراطيت وايي؛ که د افغان ولس مقاومت ته وکتل شي هغه ورځ را رسېدونکې ده.
جنرال پټرویس خو وايي، په افغانستان کې د امريکا پوځ پاتې کېدل او هم ورته نور پوځ لېږل د موجوده ناامنيو لپاره مؤثر دي؛ خو په افغانستان کې د ټولو بهرنيانو په مقابل کې مقاومت هم د افغان ولس لپاه مؤثر دى، په هر قيمت چې وي بايد مقاومت ته یې دوام ورکړل شي.
له ٢٠٠١ميلادي کال راپدېخوا د ناټو او امريکايي پوځ قوماندانان په افغانستان کې د طالب وسله والو د زور د اوبه کېدو راپورونه ورکوي او هره ورځ پرې د واشنګټن پوست سرليکونه تاوده ساتي؛ خو ورسره دا اعتراف هم کوي چې افغان حکومت د بهرنيو پوځونو په موجوديت کې د مخالفو وسله والو په مقابل کې کاميابي ترلاسه نه کړاى شوه.
که هر څو امريکايي قوماندانان ووايي، چې امريکا په افغانستان کې پاتې کېدو ته اړتيا لري، خو دا چې امريکا په افغانستان کې خپل حضور اړین بولي؛ افغانان خو حق لري چې خپله دفاع وکړي او دفاع ته یې اړتيا لري.
