سعودي: په امنیتي ځواکونو راکیټي برید شوی
د سعودي عربستان د کورنیو چارو د وزارت ویاند منصور الترکي رسنیو ته د یوې خبرپاڼې په استولو سره ویلي چې د القطیف ښار د منصوره په سیمه کې د امنیتي ځواکونو په موټر هغه مهال برید ترسره شو چې په ګزمه بوخت ؤ .
چارواکو ویلي دي په برید کې یو پولیس وژل شوی او ۳ تنه نور ټپیان دي چې سمدلاسه د ښار روغتون ته لیږدول شوي.
د دې برید مسئولیت تر اوسه کومې ډلې ندی منلی خو په سعودي ځواکونو وخت ناوخت د یمن شیعه حوثي ملیشې او داعشې اورپکې بریدونه کوي.
د سعودي امنیتي چارواکي وایي د پیښې په اړه یې په سیمه کې پراخې پلټنې پیل کړې دي.
د یادونې وړ ده چې د سعودي په امنیتي ځواکونو باندې حملو پدې وروستیو کې بې مخینې زور اخیستی او د چارواکو په وینا دا په تیرو دوو میاشتو کې ۷ اووم ځل دی چې په سعودي ځواکونو مرګونې حملې ترسره کیږي.
فرید افغان
