د ملي دفاع سرپرست وزیر طارق شاه بهرامي رسنیو ته ویلي چې د امریکا نوې ستراتیژي چې ښایي تر راتلونکې یوې اونۍ به اعلان شي له افغان ځواکونو سره د جنګي ډلو پر وړاندې مبارزه شامله ده
نوموړی وایي امریکا ډاډ راکړی چې جنګي ډلو ته به ماتې ورکوي او په هغو هیوادونو چې دې ډلو ته یې ځای ورکړی فشار راوړي.
ملي دفاع وزارت وایې د روان کال تر پایه به یواځې په پوځي فشار وسله وال مخالفین خبرو ته حاضروي.
بهرامي چې تازه د ناټو له غونډې راستون شوی ویلي چې د نړیوالو همکاري ورسره ده او د نړیوالې ټولنې په مرسته به وسله والو مخالفان د جګړې له لارې د سولې خبرو ته اړ باسي.
نوموړي په داسې مهال دا څرګندونې کړې چې څو ورځې وړاندې د افغانستان په هکله د ناټو د غړیو هیوادونو کنفرانس هم بې نتیجې پای ته ورسید او د برتانیا له ۱۰۰ او د لیتوانیا له ۷ تنو عسکرو پرته هیچا هم افغان جګړې ته د سرتیرو د استولو زړه ښه نکړ.
د ناټو منشي هم ټینګار کړی ؤ چې له وسلوالو مخالفینو سره له جګړییز فشار سره سره باید دسولې خبرې وشي.
خو ځینو لویدیځو کارپوهانو بیا دنوموړي خبرې د داسې سوړ کنفرانس په ترڅ کې غولوونکې او د ماتې په معنا بللې.
د دفاع سرپرست وزیر پداسې مهال د ناټو په مرستو مخالف لوري ته ډغرې وهلې چې د هیواد یو شمیر ولایت او لسګونه ولسوالۍ لا هم د سقوط په ګړنګ ولاړې دي.
.
