(کابل ټکی کام ۱۳۹۶زمری ۷)
د غزني ولايت امنيتي مسئولين وايي، چې د وسله والو طالبانو سره په نښته کې د ګيلان ولسوالۍ امنيه قوماندان وژل شوی دی.
د غزني پوليسو ويلي، چې قوماندان عبدالمتين تېره ورځ ناوخته د یادې ولسوالۍ مربوط د ورو په سيمه کې د وسله والو په يو بريد کې وژل شوی دی.
سرچينې ويلي، په دغه بريد کې د نوموړي سره په ياده سيمه کې د پوستې قوماندان او درې نور پوليس هم وژل شوي دي.
د غزني د قره باغ ولسوالۍ امنيه قوماندان د نوموړي وژل تائید کړي او د هغه په مړينه يې خواشينې ښودلې ده.
طالبانو د دغه بريد مسئوليت په غاړه اخيستی او وياند يې ذبيح الله مجاهد په خپله رسمي ټويټر پاڼه ليکلي، چې د دوی پلويانو د يادې ولسوالۍ په ورو سيمه کې پر نوموړي بريد کړی او د ګيلان امنيه قوماندان عبدالمتين په ګډون يې ۷ تنه پوليس وژلي پنځه نور ټپيان کړي او د هغوی دوه ټانګونه يې هم ويجاړ کړي دي.
-الماس خدرخېل-
