(کابل ټکی کام ۱۳۹۶زمری ۸)
د پاکستان پينډۍ څخه پېښور ته روان د هاييس ډوله مسافر وړونکي او ټرک موټرو ټکر کړی، چې له کبله يې په دواړو موټرو اور لګېدلی او په ترڅ کې يې ۱۳ تنه مسافر د اور په لمبو کې سوځېدلي او مړه شوي دي.
ځايي سرچينې وايي، پېښه نن سهار مهال د حسن ابدال روډ په ايبټ اباد چوک کې رامنځته شوې ده.
عيني شاهدانو ويلي، هایيس ډوله مسافر وړونکی موټر د بل ټرک موټر له لوري د شا لخوا وهل شوی، چې ورسره سم لومړنی موټر د ګيس غټ پايپ لاين سره جنګېدلی او له امله يې دواړه موټر د اور په لمبو کې رایسار شوي دي.
د سرچينو په وينا، د اوروژنې ډله د درې ساعتونو په خوارۍ هم د دغه اور په وژلو سره بريالي نه شول، تر دې چې عمومي پايپ لاين کې ګيس قطع شو او بيا اور مړ شو.
مسئولين وايي، په دغه پېښه کې د سوځېدلو کسانو جسدونه يې د حسن اباد روغتون ته انتقال کړي دي.
يو تن چارواکي ډاکټر اشفاق احمد رسنيو ته ويلي، چې په هایيس موټر کې شاوخوا اته کسان او پاتې نور په ټرک کې سواره و چې له پېژندګلوی وتلي او ټول سوځېدلي دي.
د ورکړل شويو راپورونو له مخې په دغه پېښه کې وژل شوي کسان ټول پښتانه دي.
د يادونې ده، چې تېره مياشت هم د پنجاب په بهاولپور سيمه کې د تيلو د ټانکر د اورلګېدو په پېښه کې د دوسوو په شاخوا کې کسان مړه شول.
-الماس خدرخېل-
