(کابل ټکی کام ۱۳۹۶زمری۱۰ فرید افغان)
د حزب اسلامي مشر وروسته تر هغه چې په نوموړي د برید بې بنسټه ادعا شوې وه یوځل بیا په خبري کنفرانس کې راڅرګند شو او داځل د حکومتي مشارکت پځای یې د ګډحکومت د پایښت لپاره یې د پوځي مرستې ټټر وډباوو.
نوموړي چې د لغمان اوسېدونکو ته وینا کوله په خپلو خبرو کې یې په څرګند ډول وویل چې که حزب اسلامي ته د شمال امنیت وسپارل شي، په شمال کې به روانه جګړه د شپږو میاشتو دننه کې په بشپړ ډول مهار کړي.
نوموړي وویل چې نه یواځې شمال بلکه حکومت دې هره هغه سیمه چې پکې امنیتي وضعیت ډیر ترینګلی وي د امنیت چارې ور وسپاري حزبیان به یې له مخالفینو په ټولیز ډول صفا کړي.
نوموړي یوځل بیا د طالبانو پسې بدې ردې وویلې او په وینا یې چې
«یو څو سپېره د پردیو په چوپړ کې د هغوی له خوا استخدام شوي، پېرل شوي، د جنګ له پاره ګومارل شوي او توانيږي چې په اطرافو کې ولس یرغمل کړي او امنیت له منځه یوسي.»
نوموړی وایي مخالفین یې وروڼه نه بلکه دښمنان دي.
نوموړي په افغان ځواکونو او ملکیانو د امریکایي طیارو د بمبار په هکله هیڅ هم ونه ویل.
حکمتیار وروستي سیاسي خوځښتونه هم وغندل او په وینا یې دا ډلې د نظام د تضعیف لپاره ګمارل شوي دي.
نوموړي داسې مهال د هېواد په شمال کې د امنيت ټينګوالې له پاره چمتوالی اعلان کړ، چې شاوخوا یوه اونۍ وړاندې یې په حکومت کې د خپل مشارکت خبرونه په کلکه رد کړل او ویې ویل چې په شړیدلي رژیم کې به کله هم برخه وانخلي.
شنونکي وایي حکمتیار ګډ حکومت د خپلې بقا لپاره راوستلی دی او کله هم چې د کومې ډلې فشار پرې راشي نو د نوموړي څخه سیاسي استفاده کوي.
داچې څو اونۍ وړاندې د شمال ټلوالې د نوې جبهې خطرات ډیر ؤ نو تر ټولو مخکې حکمتیار یاد اتیلاف وغندلو او د یو نوي جریان د پیل خبر یې ور کړ،او اوس چې د طالبانو پرمختګونه ورځ تربلې په پراخیدو دي هم یې په وړاندې حکمتیار توند دریځ خپل کړی او آن چې د هغوی د نابودۍ ټټر یې هم وهلی دی.
د چارو پوهان وایي حکمتیار تر ټولو سیاسي مشرانو ژور لید لري خو په متزلزل او بدلیدونکي دریځ یې هیڅوک هم باور نلري.
