(کابل ټکی کام ۱۳۹۶زمری ۲۶): سعودي تېره ورځ اعلان کړه، چې د قطر حاجيانو ته يې خپله پوله پرانيستلې او د دغه هېواد اتباع کولی شي، چې د حج فريضې ادا کولو لپاره سعودي عربستان ته ورشي.
شاوخوا دوه مياشتې مخکې سعودي او يو شمير نورو خليجي هېوادونو قطر د ترهګرو سره په ملاتړ تورن کړ او له دغه هېواد سره يې اړيکې پرېکړې.
د جون په پنځمه نېټه سعودي عربستان، عربي اماراتو، بحرين او مصر له قطر سره خپلې ټولې ديپلوماتيکي، سياسي او تجارتي اړيکې پريکړې او پر دغه هېواد يې ټولې پولې وتړلې.
سعودي ويلي، قطريانو ته به په دوو هوايي ډګرونو کې د کوزېدو اجازه ورکړي او د دغه هېواد د سلوا سرحدي پوله به د حاجيانو د ورتګ لپاره پرانيستې وي.
د سرچينې په وينا، ملک سلمان قطر ته د ځانګړو الوتکو د استولو امر کړی، ترڅو له دوحې څخه سعودي عربستان ته حاجيان انتقال کړي.
سعودي عربستان دغه پريکړه د شهزاده محمد بن سلمان او د قطر د شیخ ترمنځ له کتنې وروسته کړې ده.
