(کابل ټکی کام ۱۳۹۶زمری ۲۶): د امريکا پوځ وايي، چې د ننګرهار په ولايت کې يې د عملياتو پر مهال يو سرتيری وژل شوی او يوبل ټپي شوی دی.
د پوځ چارواکو ويلي، چې دغه پوځي يې د داعش وسله والو سره په جګړه کې لومړی ټپي او وروسته يې ساه ورکړې ده، خو د پېښې د ځای او د نوموړي د ټپي کېدو په اړه يې نور معلومات نه دي ورکړي.
په ورته وخت کې د ننګرهار د والي وياند عطاءالله خوږياڼي د امريکايي عسکر وژنه تائيد کړې او ويلي يې دي چې ياده پېښه د اچين ولسوالۍ په مامندره سيمه کې رامنځته شوې ده.
نوموړي د افغان سرتيرو د وژنې يا ټپي کېدو په اړه څه نه دي ويلي، خو راپورونه وايي په دغه پېښه کې د افغان ځانګړو ځواکونو دوه سرتيري وژل شوي او يو شمير نور ټپيان دي.
په عين حال کې د ننګرهار د پوليسو وياند حسين مشرقيوال وايي، چې د چهارشنبې په ورځ د اچين ولسوالۍ په مربوطاتو کې د هوايي بريدونو په ترڅ کې ۲۵ داعش وسله وال وژل شوي دي.
تر اوسه پورې د داعش ډلې د دغه تازه نښتې او بريدونو په اړه رسنيو ته څه نه دي ويلي.
