(کابل ټکی کام ۱۳۹۶ وږی ۱ فریدافغان)
د الجزیرة نړیوالې شبکې اعلان کړی چې سږکال د دې هیواد خدماتي شرکتونه نشي کولی چې قطري حاجیان تر مکې مکرمې ورسوي او په خبره یې چې په قطر کې د حج خدماتي شرکتونو سږکال حرمین شریفینو ته د حاجیانو له لیږدولو څخه معذرت غوښتی.
یادو شرکتونو خواشیني ښودلې چې سعودي عربستان ورته داسې قوانین وضع کړي چې د حاجیانو د لیږد پروسه له خنډ او ستونزو سره مخ کوي.
وړاندې د قطر هیواد په سعودي عربستان نیوکه کړې وه چې د حج له فریضې څخه د یو سیاسي فشار په توګه استفاده کوي.
الجزیرې ویلي چې یادو ترانسپورتي شرکتونو ورته ویلي چې په سعودي عربستان کې د حج په مراسمو کې قطري مامورین نه وي او له دې سره سره په جدې ښار کې د دې هیواد قونسلګرۍ هم شتون نلري نو بنا حاجیان نشي کولای چې په هوسا او ډاډمنه فضا کې د حج فریضه ادا کړي.
د یادو شرکتونو مسؤلینو همداراز ویلي چې حاجیانو ورسره نومونه ثبت کړي او پیسې یې هم رسولې خو له دې ویرې چې هسې نه چې قطري حاجیانو ته په سعودي کې امنیتي ستونزې پیدا شي، له همدې کبله یې خپل نومونه بیرته لغوه کړي او حج ته له تګ څخه په شا شوي دي
د الجزیرې په خبره چېخدماتي شرکتونو ورته ویلي چې حج ته د ګوتو په شمیر ورځې پاته دي نو نه شي کولی چې په مکه مکرمه او مدینه منوره کې د حاجیانو د استوګنې لپاره لازم ترتیبات ونیسي.
یوه بله خبره چې قطري حاجیانو او د خدماتي شرکتونو مالکین یې کوي داده چې د دې هیواد اتباع نشي کولی خپل پولي واحدونه، قطري ریال په سعودي ریال باندې بدل کړي او د مالي تعاملاتو پر وخت په سعودي بانکونو کې له سختو ستنزو سره مخ کیږي .
لویه ستونزه چې د قطر خدماتي شرکتونه ترې سر ټکوي داده چې سعودي عربستان د قطر هوايي شرکت الوتکو ته اجازه نه ورکوي چې د جدې ښار او مدینې منورې هوايي ډګرونو ته مستقیم پروازونه وکړي.
وړاندې د سعودي عربستان پاچاسلمان ویلي و چې د قطر ټول حجاج په خپلو الوتکو کې د جدې ښار ته رسوي
خو د قطر د بهرنیو چارو وزارت ویلي سعودي په لوی لاس د حج له مراسمو سیاسي استفاده کوي او په وینا یې چې د نړۍ له معمول سره سم د هر هیواد حاجیان د خپل هیواد د هوايي، ځمکني او بحري نقلیه وسایلو په واسطه حج ته ځي او یا لږ تر لږه په هغو نقلیه وسایلو کې سفر کوي چې خپل هیواد یې ورسره د حاجیانو د لیږد تړون کړی وي.
نوموړي د سعودي دا اقدام چې پر اساس یې قطري حاجیان د خپل هیواد هوايي شرکت په الوتکو کې سفر نه شي کولی او تنها د سعودي د هوايي شرکت په الوتکو کې حج ته تلی شي غندلی دی
قطري چارواکي وایي لمړی ځل دی چې سعودي عربستان د یو اسلامي هیواد پرضد داسې خصمانه چلند کوي .
تر دې وړاندې په قطر باندې د حج د مراسمو مطلق بندیز و چې بیا ځینو عرب فعالانو د سعودي دا کار داسرایلي ځواکونو کړنو ته ورته بللی و چې ترې وروسته یې لږ سهولت راووست او اجازه یې ورکړه چې یواځې هغه قطریان چې په دې هیواد کې میشت دي د حج لپاره ورتلی شي خو د قطر هغه اتباع چې له دې هیواد څخه خارج وي نشي کولی.
په وروستیو کې بیا سعودي باچا نور تخفیف هم راوست چې یواځې د سعودي الوتکې د دې هیواد حاجیان لیږدولی شي او بس چې د دې چارې سره قطر مخالفت څرګند کړ او د سعودي الوتکو ته یې د دې چارې اجازه ورنکړه.
