(کابل ټکی کام ۱۳۹۶ وږی ۸ فرید افغان)
د اسوشتیدپریس خبري اژانس د افغان حکومت د ځینو سرچینو په حواله خبر ورکړی دی چې د ملي امنیت رئیس او د ملي امنیت مشاور اتمر، او ستانکزی نږدې هره ورځ د طالبانو د قطر له دفتر سره په تماسونو بوخت وي.
اسوشتیدپریس ویلي د طالبانو اوسنۍ عمده غوښتنې څلور ۴ دي
لمړی داچې موقته بې پرې اداره به رامنځته کیږي چې د کرزي او غني په ادارو کې یې کار نه وي کړی، طالبان او حکومت به تر انتخاباتو پورې پخپلو سیمو واکمن وي.
دوهم دادی چې د نجونو د درس مخه دې نه نیول کیږي خو نجونې او هلکان دې ګډ درس نه وایي بلکه جلا ښوونځي باید ورته ځانګړي شي.
بل وړاندیز یې دا دی چې ځانګړې محکمه دې جوړه شي او له غاصبینو څخه دې زرګونه جریبه نیول شوې ځمکې بیرته را وګرځوي.
اي پي آژانس ویلي د طالبانو بله غوښتنه داده چې ښځې په حکومت کې د کار کولو حق لري خو د سترې محکمې مشرانې نشي ټاکل کیدی او په اساسي قانون کې دې ضمانت ورکړل شي چې ښځه به د افغانستان جمهور رئیسه نه ټاکل کیږي.
طالبانو په یوه خبرپاڼه کې ویلي چې (موږ دا پروپاګند په کلکه ردوو، د کابل له بې واکه او بې اختیاره ادارې سره اسلامي امارت هيڅ مسئول او ارګان تماس ندی نیولی.)
د افغانستان ملي امنیت عمومي ریاست هم د طالبانو له چارواکو سره د دغه ریاست د مشر معصوم ستانکزي د تماسونواو ټیلیفوني خبرو په اړه خپاره شوي رپوټونه ناسم بللي
طالبانو ویلي چې د مذاکراتو په اړه خورا روښانه دریځ لري او کومې خبرې چې یاد آژانس د نامعلومو سرچینو له قوله کړې جزئي حاشیوي خبرې دي چې په اړه به یې له مذاکراتو وروسته تصمیم نیول کیږي
(اسلامي امارت د مذاکراتو په اړه خورا روښانه دريځ لري، اصلي لوری زموږ په مقابل کې اشغالګر جهت دي، او د هیواد اساسي مسئله د بهرني اشغال شتون دی)
طالبانو ویلي چې اوسمهال یواځې د هیواد دفاع ورته اولویت لري او پداسې مسایلو بحث د وخت ضیاع ده
(اصلي موضوع په افغانستان کې د بهرني اشغال شتون، دلته د وژنو او د جګړې د دوام لپاره د اشغالګرو امریکايانو شومې موخې دي، او د اشغال په شتون کې په نورو حاشیوي او جزئي مسائلو باندې بحث ګټه نه لري)
