د باګرام هوايي ډګر په درېمه دروازه کې په یوه سرتېري برید کې ګڼ شمېر بهرني عسکر وژل شوي او ټپیان شوي دي.
یوې باوري سرچېنې کابل ټکي کام ته ویلي چې سرتېری برید نن مازدیګر شاوخوا شپږ بجې د موټر سایکل په وسیله د باګرام هوايي ډګر په درېمه دروازه کې په هغو بهرنیو سرتېرو ترسره شوی چې د پلان جوړولو لپاره راغونډ شوي وو.
وسله وال طالبان وايي چې سرتېری برید دوی کړی دی او ۲۰ امریکايي عسکرو ته مرګ ژوبله اوښتې ده. د طالبانو ویاند ذبیح الله مجاهد پر خپله ټوېټر پاڼه لیکلي چې برید د کاپیسا ولایت اوسېدونکي محمد ادریس د موټر سایکل په وسیله ترسره کړی دی. د مجاهد په خبره فدايي مجاهد په خورا تکتیک سره د برید ځای ته ځان ورساوه او سرتېری برید یې کړی دی.
د باګرام ولسوال عبدالشکور قدوسی وايي چې په برید کې ۳ کسان ټپيان شوي دي خو دا یې نه دي ویلي چې څوک دي. بهرنیو ځواکونو تر دې دمه څه نه دي ویلي.
طالبان وايي، ”د برید هدف له امریکايي اشغالګرو عسکرو څخه د هغه توهین انتقام اخیستل وو چې نن يې په پروان ولایت کې د کلمي طیبې توهین وکړ“.
پرون امریکایي الوتکو د پروان ولایت په ځینو سیمو کې امریکایي الوتکو داسې پاڼې شیندلې چې پکې په لوی لاس مقدساتو ته سپکاوی شوی او خلک د طالبانو پر ضد جګړې ته رابلل شوي دي.
په پاڼو کې له خلکو غوښتل شوي چې د ایتلافي ځواکونو ترڅنګ دې ودریږي او په څنډو کې یې قرآني آیات او د طالبانو په بیرغ کې د توحید لیکل شوې کلمه راوړل شوې چې پسې وروسته یې د سپي او زمري څېرې هم انځور کړې چې د دې کلمې له منځه وړل غواړي.
له پیښې وروسته د امریکايي ځواکونو د ځانګړو عملیاتو قومندان جنرال جیمز لینډر ددغه کار له امله بښنه غوښتې او ویلي یې دي چې ددغه کار هر اړخیزه څېړنه کوو.
