(کابل ټکی کام ۱۳۹۶ وږی ۱۶ فرید افغان)
امریکایي چارواکو بالاخره هغه شمیر عسکر چې څو میاشتې وړاندې یې افغانستان ته د استولو اعلان کړی و، اوس تیار کړي او په څو اونیو کې به را ورسیږي.
امریکایي ورځپاڼې واشنګټن پوسټ د چارواکو له قوله خبر ورکی چې د دفاع وزیر او د کانګرس د چارواکو لخوا د تړلو دروازو شاته په یوه غونډه کې پریکړه شوې چې افغانستان ته به د ۳۵۰۰ په شاوخوا کې عسکر ولیږي.
امریکایي چارواکو ویلي چې د دفاع وزیر تر رسمي اعلان پورې له رسنیو سره پدې هکله څه ویلو ته چمتو ندي.
تر دې وړاندې امریکایي مطبوعاتو داسې راپورونه خپاره کړي وو، چې ښايي امریکا افغانستان ته ۳۹۰۰ امریکايي عسکر ولېږي، خو اې بي سي نیوز د امریکایي چارواکو له قوله ویلي، چې جیمز متیس د افغان جګړې لپاره یواځې د ۳۵۰۰ اضافي عسکرو لېږل تایید کړي دي او امریکايي چارواکو ته امر شوی، چې ددوی د لېږلو تیاری ونیول شي.
باید وویل شي چې تیره اونۍ د امریکا د دفاع وزیر جیمز مټیس په یوه مطبوعاتي ناسته کې خبریالانو ته ویلي و چې افغانستان ته یې د اضافي امریکایي عسکرو د لیږلو امر لاسلیک کړی خو دا یې نه و ویلي چې څومره عسکر به لیږي. مټیس ویلي و چې د کانګریس غړیو ته د معلوماتو د ورکولو نه وروسته به د عسکرو د شمیر مسله د امریکایانو سره شریکه کړي.
افغانستان ته د ۳۵۰۰ اضافي عسکرو په استولو سره به په افغانستان کې د ټولو امریکایي عسکرو شمیر ۱۴ زرو ته ورسیږي هغه شمیر چې دوی رسما منلې.
خو ځینې امریکا میشتي څیړونکي بیا پدې آند دي چې امریکا تر ۳۰ زرو زیات خپل او د کرایي کمپنیو عسکر لري چې دا شمیره رسما امریکایان نه مني.
امریکا وایي په روان میلادي کال کې یې ۱۰ عسکر وژل شوي او داځل غواړي چې د خپلو عسکرو د تحفظ لپاره له هوایي حملو ډیر کار واخلي.
ځینو امریکایي چارواکو چې د جمهور رئیس ډونالډ ټرمپ تګلاره یې لیدلې د نوم نه ښودلو په شرط رسنیو ته ویلي چې “امریکایي عسکر اجازه لري په طالبانو حمله وکړي حتی که هغوي په مستقیم ډول افغان امنیتي ځواکونو ته خطر هم نه وي پیښ کړی.”
چې پدې سره به لوی ګواښ ملکي وګړو ته پیښیږي، او د یو څیړنیزې ادارې د راپور سره سم یواځې په تیره میلادي میاشت کې د سختو بمباریو له کبله شاوخوا ۲۵۴ ملکي هیوادوال وژل شوي دي
