چين د تاجکستان له لارې بدخشان ته سړک جوړوي
(کابل ټکی کام ۱۳۹۶وږی ۱۶): چين وايي، په پام کې لري چې د تاجکستان له لارې يو سړک جوړ او غواړي چې د بدخشان ولايت له چين سره وصل کړي.
دغه څرګندونې تېره ورځ په افغانستان کې د چين سفير ياوجينګ د بدخشان ولايت نه له ليدنې پر مهال وکړې او ژمنه يې وکړه، چې د ياد ولايت د اشکاشم ولسوالۍ نه به د تاجکستان تر پولې پورې يو سړک جوړ کړي.
د چين سفير وويل، د بدخشان له چارواکو سره يې د چين او تاجکستان تر منځ د سړک په بيارغونه هم خبرې کړي او په وينا يې چې د دغه سړک په جوړېدو سره به د افغانستان د سوداګريزې راکړې ورکړې لاره هم جوړه شي.
اوس مهال په قاشغر او بدخشان کې د نوري فايبر پر پروژې کار روان دی او د چين سفير د يادې پروژې د مرستې په غځولو ټينګار وکړ او زياته يې کړه چې په نږدې راتلونکي کې به خلکو ته د لوړو زده کړو ځانګړي بورسونه هم ورکړل شي.
د بدخشان ولايت د واخان دهليز يو طرف ته له پاکستان سره درې اړخيزې پولې لري او بل سر يې له تاجکستان سره لګېدلی چې اوس مهال پرې د تګ راتګ هيڅ لار نشته، خو چين وايي چې د افغانستان دغه لرې پرته غرنۍ سيمه به ډير ژر له چين سره ونښلوي.
دا دهلیز د افغانستان او چین د کوچنۍ سوداګرۍ تر ټولو مستقیمه لار ده خو د اوږدې مودې راهسې پرې تګ راتګ نه کیږي.
د مالوماتو له مخې چينايانو په ۱۹۴۹کې د واخان او چين تر مينځ سرحد له دې ويرې وتاړه چې ممکن روسان له همدې لارې د چين په خاوره کې مداخله وکړي.
