(کابل ټکی کام ۱۳۹۶وږی ۱۶): وسله والو طالبانو د فارياب ولايت په پشتونکوټ ولسوالۍ کې د دولتي ځواکونو په پوستو بريدونه کړي، چې په ترڅ کې يې څلور پوستې د طالبانو لاسته لوېدلي دي.
طالبانو رسنيو ته په لېږلې خبرپاڼه کې ويلي، چې د دوی وسله والو تېره شپه د يادې ولسوالۍ د “رئيس قل” په سيمه کې په پرتو دولتي پوستو د سپکو او درنو وسلو بريدونه وکړل، چې شاوخوا نهه ساعته يې دوام وکړ.
طالبانو ويلي، په دغه جګړه کې يې د (رئيس قل) سيمه او دوه پوستې ونيولې او زياتوي چې دولتي عسکر د تلفاتو په لېدلو سره له سيمې وتښتېدل.
دغه راز طالبان وايي، په ياده ولسوالۍ کې يې د ګردي مشکار سيمه او پکې دوه پوستې هم نيولي، چې دوه پوليس پکې وژل شوي او دوه نور ټپيان دي.
په خبرپاڼه کې راغلي، چې د دواړو جګړو په پايله کې د دوی وسله والو (طالبانو) له دولتي عسکرو څوارلس موټرسايکلونه، وسلې او په زياته اندازه مهمات هم نيولي دي.
يوې سيمه ييزې امنيتي سرچينې د طالبانو دغه بريدونه تائيد کړي او زياتوي چې اوس مهال طالبان د نورو پوستو د نيولو لپاره امادګي نيسي، ښايي په سيمه کې نورې پوستې هم سقوط وکړي.
تر اوسه د دولت کومې رسمي سرچينې په دې اړه څه نه دي ویلي.
طالبان وايي، په ټوله جګړه کې د دوی يو تن طالب وژل شوی او يو بل ټپي دی.
