(کابل ټکی کام ۱۳۹۶وږی ۱۶): تېره ورځ ناوخته وسله والو طالبانو د دايکندي ولايت د اجرستان ولسوالۍ په مربوطاتو کې د ملي اردو يوه چورلکه رانسکوره کړه، چې په ترڅ کې يې له لسو زیاتو عسکرو ته مرګ ژوبله واوښته او اوس مهال په سيمه کې جګړه روانه ده.
د چورلکې نسکورېدل د غزني ولايت امنيه قومندان جنرال محمد زمان تائيد کړي او ويلي يې دي چې ياده چورلکه د يوې ونې سره لګېدلې او رالوېدلې ده.
خو طالبان وايي، چې د ملي پوځ دغه چورلکه د دوی د ځواکونو له لوري ويشتل شوې او د طالبانو او دولت تر منځ د جګړې په لومړۍ کرښه کې رالوېدلې ده، چې پکې څلور تنه عسکر وژل شوي او لس تنه نور ټپيان دي.
طالبانو نن رسنيو ته په لېږلې خبرپاڼه کې ويلي، چې دولتي ځواکونو په سيمه کې څو ځله د يادې چورلکې د ټوټو د وړلو په موخه تعرضي بريدونه وکړل، چې د تلفاتو په ليدلو سره بيرته په شاه وتمبول شول.
يوې باوري سرچينې کابل ټکی کام ته وويل، چې د چورلکې د لوېدو په سيمه کې د طالبانو او دولتي ځواکونو تر منځ سخته جګړه روانه ده.
طالبانو هم په سيمه کې د تازه نښتو راپورونه ورکړي، خو دولت ته د اوښتو تلفاتو د کره شميرو په اړه يې څه نه دي ويلي.
د اجرستان ولسوالۍ ډیری سيمې د وسله والو طالبانو تر حاکميت لاندې دي، چې له تير يو کال راهيسې د دغه ولسوالۍ ودانۍ هم تر سختۍ کلابندۍ لاندې ده او پکې ميشت دولتي عسکر د ولسوالۍ نږدې سيمو ته هم تګ راتګ نه شي کولی.
