درزاب کې دولتي ځواکونه کلابند دي
(کابل ټکی کام ۱۳۹۶وږی ۱۹): د جوزجان ولايت په درزاب ولسوالۍ کې له تيرې څه مودې راهيسې د وسله والو طالبانو، دولتي ځاکونو او داعش وسله والو تر منځ درنې نښتې وشوې، چې په پايله کې يې يو شمير سيمې د وسله والو طالبانو لاس ته ولوېدې.
د دغه ولايت چارواکي وايي، چې اوس مهال په درزاب ولسوالۍ کې د وسله والو فعاليتونه زيات شوي او افغان دولتي ځواکونه د وسله والو تر سختې کلابندۍ لاندې دي.
د درزاب سرپرست ولسوال باز محمد داوري رسنيو ته ويلي، چې دولتي ځواکونه يواځې په امنيه قومندانۍ او د ولسوالۍ په ودانۍ کې کلابند پاتې دي او بهر ته تګ راتګ نه شي کولی.
په عين حال کې د جوزجان ولايتي شورا چارواکي وايي، چې په په دغه ولايت کې د نا امنيو او د وسله والو د فعاليتونو د زياتېدو له ويرې په خپلو کورنو کې بند پاتې دي او زياتوي چې د خوراکي توکو له کمښت سره هم مخ دي.
د دغه ولسوالۍ اوسېدونکي وايي، چې له يوې خوا د جګړو له کبله ځپل کېږي او له بلې خوا ورسره سيمه ييز پوليس ناوړه چلند کوي او د هغوی له لوري زورول کېږي.
څه موده وړاندې وسله والو طالبانو د يادې ولسوالۍ ډیری سيمې له دولتي ځواکونو ونيولې، چې اوس مهال يې د يادې ولسوالۍ په نږدې نيم کيلو مترۍ کې خپل فعاليت کوي او وخت ناوخت په دولتي ځواکونو وسله والو بريدونه ترسره کوي.
