ايرما توفان د فلوريډا د ۳۴ لکه کورونو برېښنا پرې کړې
(کابل ټکی کام ۱۳۹۶وږی ۲۰): د ایرما سمندري طوفان د امريکا په فلوريډا ايالت ورنازل شوی، چې راپورونه وايي تر دې دمه يې د ميامي ښار ځينې برخې په اوبو کې غرقې کړي او د دغه ايالت د ۳۴ لکه کورونو برېښنا يې پرې کړې ده.
د امريکا د هواپېژندنې ادارې ويلي، چې نوموړي طوفان د فلوريډا سويلي ټاپوګان سخت زپلي او ښايي د دغه طوفان څپې تر څلور نيم فوټه لوړې شي چې په دې سره به يې خطرات نور هم زيات شي.
تر دې دمه په فلوريډا ايالت کې د توپان له امله د درې کسانو د مړه کېدو او يو شمير نورو د ټپي کېدو راپورونه ورکول شوي دي.
چارواکي وايي، د توپان د ويرې له امله له نوموړي ايالت څخه ۶.۳ ميليونه کسان نورو سيمو ته کډه شوي دي.
د څلورمې درجې دا سمندري توپان له چټک باد سره مل دی چې په ساعت کې ۲۱۰ کیلومتره مزل وهي.
د فلوریډا چارواکي وايي، د ایالت لوېدیځې سمندرغاړې ته اندېښمن دي چې توپان پرې ور روان دی او د دغه ايالت والي ريک سکاټ د هغه سیمو د پنځو میلیونو اوسیدونکو د تخلیې امر کړی چې له ګواښ سره مخ دي.
تمه ده چې دغه توپان نن ناوخته د مکسیکو خلیج، تامپا او سنټ پیټرزبرګ سیمو ته ورسېږي.
کارپوهان اندېښنه څرګندوي، چې یاد توپان به په راتلونکو دوه ساعتونو کې د فلوريډا له ټيټو سيمو تېرېږي، چې ورسره به تېزه هوا په ساعت کې ۲۰۹ کيلومتره وي، چې له دې سره به د دغه ايالت پراخې سيمې نورې هم زيانمنې شي.
تر دې مخکې د ايرما توپان په کرابين ټاپوګانو باندې تېر شو، چې له امله يې ۳۰ کسان ووژل شول.
