(کابل ټکی کام ۱۳۹۶ وږی ۲۰ فریدافغان)
د ولسي جرګې غړو نن ورځ د اووړي له رخصتیو څخه له راګرځیدو وروسته د امریکا د هوايي بریدونو او نوې تګلاره په اړه توند غبرګون ښودلی دی.
د ولسي جرګې وکیلانو ویلي چې که څه هم ګډحکومت د امریکایانو په وساطت رامنځته شوی دی، خو په وینا یې چې ګډ حکومت دې د امریکا هرې پریکړې ته له فکر او تحقیق پرته د منلو سر نه ښوروي.
دجرګې غړو به لوی اکثریت د امریکايي سرتېرو له را استولو سره مخالفت ښکاره کړ او څرګنده یې کړه چې امریکا په لوی لاس د جګړې اور ته لمن وهي.
داچې میاشت وړاندې په امریکا کې افغان سفیر او د ارګ ویاندویانو ویلي و چې امریکا د دوی په سلا او مشوره د افغانستان پر وړاندې خپله تګلاره ټاکلې ، پدې اړه د ولسي جرګې وکیلانو په وضاحت سره وویل چې ‹‹ امریکا افغان حکومت ته د تګلارو په ټاکلو کې هېڅ ډول صلاحیت نه دی ورکړی او افغان حکومت آن ددې اجازه هم نه لري چې د سولې خبرې وکړي ››
دولسي جرګې غړو د وروستیو هوایي بریدونو په هکله چې قربانیان یې ټول ملکي وګړي و، وویل ‹‹د امریکا نوې تګلاره چې بحث یې یوازې د افغانانو بمبارول دي په هېڅ ډول ورته د منلو نه ده››
د ولسي جرګې غړو له افغان حکومت نه هم وغوشتل چې د امریکا د خپلسریو پر وړاندې دې غږ اوچت کړي. د ولسي جرګې د غړو په وینا امریکا یوازې غواړي په افغانستان کې جګړه اوږده کړي او د سولې لپاره هېڅ پلان نه لري. د ولسي جرګې غړي وايي افغان چارواکي باید د امریکا د وروستیو اقداماتو په اړه ملت ته وضاحت ورکړي.
