(کابل ټکی کام ۱۳۹۶وږی ۲۱): د هند حکومت له افغانستان سره د څلورو هوکړه ليکونو لاسليک وکړ، چې له مخې به يې په ۳۱ ولايتونو کې ۱۲۶ ټولګټې پروژې پيل شي.
دا هوکړه ليکونه د افغانستان د بهرنيو چارو وزير صلاح الدين رباني او د هند د بهرنيو چارو له وزيرې سوشماسوراج تر منځ په نوي ډيلي کې لاسليک شول.
چارواکو د يادو پروژو د لګښت په اړه نور جزيات نه دي ورکړي، خو د هند د بهرنيو چاروز وزارت په يوه اعلاميه کې ويلي، چې دغه پروژې به د حکومتولۍ، روغتيا، انرژۍ، کرنې او ورته نورو پرمختيايي برخو کې ترسره شي.
په اعلاميه کې راغلي: (په دې پروژو کې د کابل او چاريکارو د پاکو اوبو رسولو سيستم، د شاتوت برېښنا بند، په مزارشريف کې د يوه پولي کلينيک جوړولو تر څنګ د بېرته راستنېدونکو لپاره د کورونو جوړول شامل دي.)
هند وايي، چې راتلونکې کال کې به د افغان پوځ د پنځه سوه وژل شويو سرتيرو اولادونو ته تحصيلي بورسونه هم ورکړي.
په دې کتنه کې د افغانستان د بهرنيو چارو وزير صلاح الدين رباني له هندي چارواکو سره په امنیتي مسائلو خبرې کړي او له هغوی يې د چاه بهار بندر د پراختيايي چارو د چټکولو غوښتنه کړې ده.
