(کابل ټکی کام ۱۳۹۶وږی ۲۲): د جلال اباد څخه تورخم ته تلونکي مسافر او پر دغه لاره د پرتو ولسواليو اوسېدونکي شکايت کوي، چې وخت ناوخت د جلال اباد هوايي ډګر مخې ته لويه لاره تړل کېږي او دوی له سختو ستونزو سره مخ کېږي.
دغه مسافر او ځايي اوسېدونکي وايي، هغه مهال بیا په ډېرو سختو حالاتو کې د دغه هوایي ډګر جنوب او شمال لوري ته په فرعي سړکونو تګ راتګ کوي.
پر دغه لاره يو تن موټرچلوونکی شاکر کابل ټکی کام ته وويل، ډیری وخت د ناڅرګند لامل له مخې لویه لاره په ساعتونو ساعتونو بنده وي او هیڅوک نه شي کولی چې پرلاره تګ راتګ وکړي.
نوموړي زياته کړه: (که مړی وي، که واده وي که هرڅومره سخت مريض ولرې، چې يو ځل بهرنيان لاره وتړي بيا چاته د تګ راتګ اجازه نه ورکوي). هغه وايي کله ناکله چې لاره بنده شي په خوشګمبد ځو، يا په رينګ روډ زو هغه لاره هم لرې ده او وخت ناوخت غله هم راووځي، مونږ هم لوټي او سورلۍ هم چور کوي.
دی وایي چې پر دې لاره د موټرو ګڼه ګوڼه زیاته وي او په فرعي سړکونو په ساعتونو ساعتونو ناروغان په موټرو کې بند پاتې وي.
له جلال اباده طورخم ته تلونکی يو مسافر وايي، کله چې لاره بنده شي، موټر چلوونکي هم ترې ډيرې پيسې اخلي او په وخت خپل منزل ته نه شي رسېدلی.
له بل لوري په دغه لويه لاره هره ورځ سفر کوونکی سيداجان چې د کوټ ولسوالۍ اوسیدونکی دی وایي، د هوایي ډګر ساتونکي د ولسونو ستونزو ته نه ګوري او هر ماذيګر دغه لاره د موټرو پر مخ تړي.
نوموړی وايي، کله ناکله دومره ډيره دا لاره بنده شي چې خلک يې هيڅ په سور نه پوهيږي، چې ولې تړل شوې خو په وينا يې چې يواځې د ولس ځورول يې مقصد وي نور هيڅ نشته.
په عين حال کې د ولايتي شورا وکيل ذبيح الله زمری وايي، چې د يادې ستونزې په اړه يې د ولايت مقام او هوايي ډګر مسئولينو سره د خلکو اندېښنې شريکې کړي خو هغوی يې په اړه هيڅ اقدام نه دی کړی.
هغه وايي، که د بهرنيو ځواکونو له خوا د ولس سره د دوی دغه ډول چلند همداسې دوام پيدا کړي، نو خلک مجبورېږي چې پر وړاندې يې خپل غبرګون ښکاره کړي.
