(کابل ټکی کام ۱۳۹۶ وږی ۲۲ فرید افغان)
امریکایي رسنۍ وایي چې امریکا په افغانستان کې د تیرکال په پرتله د بې پیلوټه یا ډرون الوتکو په مټ دوه برابره زیات بریدونه کړي .
د راپورونو ترمخه پداسې حال کې چې سږکال لا میلادي کال هم ندی پوره شوی امریکایانو تر ۲ زره ډېره بمونه په افغانستان کې غورځولي دي.
امریکایي چارواکو ژمنه کړې چې هڅه کوي په افغانستان هوایي بریدونه نور هم زیات کړي تر څو پدې توګه ټول تمرکز په هوایي بریدونو وکړي او له مخامخ شخړو خپل پوځیان څنډې ته کړي.
د افغانستان پر وړاندې د امریکایي ولسمشر دپالیسۍ له ابلاغ وروسته پدې وروستیو کې هوایي بریدونه بې مخینې زیات شوي چې غوڅ اکثریت قربانیان یې ملکي وګړي دي.
یوې څیړونکې ادارې خبر ورکړی چې یواځې د تیرې میاشتې په اوږدو کې ۲۵۹ ملکیان وژل شوي او تر دری نیم سوو زیات ټپیان دي.
دا راپور داسې مهال خپریږي چې څو اونۍ وړاندې امریکا تائید کړه چې افغانستان کې یې د تیرکال په نسبت څو برابره زیات لوی بمونه اورولي دي او لا هم غواړي دې چارې ته ادامه ورکړي.
د یادونې وړ ده چې تیره ورځ ولسي جرګې هم امریکایي پوځیان په ټولوژنه تورن کړل او د بمباریو ډیرښت یې د ولسي وګړو پرضد د امریکا نوې پالیسي وبلله چې په وینا یې امریکا خپله پالیسي په ګډحکومت په پټو سترګو تحمیل کړې ده
