دفاع وزارت هغه راپورنه رد کړي چې په کې ویل شوي و طالبان د افغانستان پر ۴۵٪ خاورې کنټرول لري.
دفاع وزارت وايي چې د هېواد په ټولو ولایتونو کې دولتي حاکمیت ټینګ دی.
ځو ورځې وړاندې لانګ وار ژورنال ویبپاڼې په خپل یوه تازه رپوټ کې ویلی و چې وسله وال طالبان د افغانستان پر ۴۵٪ ولسوالیو په پوره ډول ولکه لري او یا هم په کې له افغان ځواکونو سره په جګړه بوخت دي.
د لانګ وار ژورنال معلومات همداراز ښيي چې طالبان ۴۱ ولسوالۍ په پوره ډول په کنټرول کې لري او په ۱۱۸ ولسوالیو کې په جګړه بوخت دي.
خو د دفاع وزارت ویاند، دولت وزیري نن سهار رسنیو ته ویلي چې یوازې په هلمند، غزني، بدخشان او زابل کې یو څو ولسوالۍ سقوط دي چې ټول شمېر یې ۹ ولسوالیو ته رسېږي، نور په ټول هېواد کې دولتي حاکمیت ټینګ دی.
وزیري نن سهار ازادي راډیو ته ویلي، ”په افغانستان کې له څلور سوه ولسوالیو څخه ډېرې فعالې دي، ولسوالان او قوماندان لري او دولتي حاکمیت ټینګ دی، خو په ټوله کې مونږ ۹ ولسوالۍ سقوط لرو او نېږدې ۳۵ تر ۴۰ ولسوالیو له لوړو ګواښونو او له ۲۰ تر ۳۰ ولسوالیو له متوسط ګواښ سره مخ دي، خو که چېرې تاسې دا ۴۵ سلنه یادوئ، موږ یې کاملاً ردوو.“
بل خوا، یوه طالب مشر د نوم نه ښودو په شرط کابل ټکي کام ته وویل چې د دفاع وزارت شمېرې په بشپړ ډول ناسمې دي. نوموړی وايي، ”که په رښتیني ډول سروې وشي، د دفاع وزارت څه، چې د لانګ وار ژورنال معلومات به هم غلط شي ځکه طالبان یوازې په هلمند کې ۹ ولسوالۍ په کنټرول کې لري، د هېواد په نورو برخو کې هم حکومت د ولسوالۍ په مرکزونو کې بند دی او ټولې چارې یې طالبان پر مخ وړي.“
دفاع وزارت دا څرګندونې داسې مهال کوي چې په زیاتره ولایتونو کې دولت یوازې د ولسوالۍ پر مرکزونو او پوستو واک لري او پاتې ټولې سیمې د طالبانو په لاس کې دي.
اوس مهال د هېواد زیاتره ولسوالۍ د دولتي عسکرو او طالبانو تر منځ لاس په لاس کېږي.
د روان ۲۰۱۷ز کال په پیل کې یوناما (UNAMA) په یوه رپوټ کې ویلي و چې سږ کال د هر وخت په پرتله د طالبانو بریدونه زیات شوي دي. د یوناما په خبره طالبانو د جنوري او مارچ میاشتې تر منځ، ۵۶۸۷ بریدونه ترسره کړي چې دا له ۲۰۰۱ز کال راهیسې د بریدونو یوه بې ساري شمېره ده.
