د امریکا دفاع وزارت نه پوهېږي چې د ۷۰۲ میلیونه امریکايي ډالرو په ارزښت افغان ځواکونو ته سپارل شوې مرمۍ چیرې او څنګه مصرف شوي دي.
د امریکا د دفاع وزارت د سرمفتش له لورې په یوه خپاره شوي رپوټ کې ویل شوي چې د ګډ امنیت د انتقال اداره، چې افغان امنیتي او دفاع ځواکونو ته روزنه او تجهیزات ورکوي، ډاډه نه ده چې ایا افغان ځواکونو ته ورکړل شوي مهمات په خپل ځای کې کارول شوي او که نه.
د سرمفتش ادارې ویلي چې افغان ځواکونو ته د امریکا له لورې پر اخیستل شویو مهماتو اغېزمنه څارنه نه ده شوې. په رپوټ کې راغلي چې د (ګډ امنیت د انتقال اداره – افغانستان) نه شي کولای افغان ځواکونو ته د سپارل شویو مهماتو او مرمیو اندازه ولګوي.
د رپوټ له مخې، د ۲۰۱۵ او ۲۰۱۶ز کال تر منځ د افغان ځواکونو پر مرمیو ۷۰۲ میلیونه ډالره لګول شوې دي. چارواکو ویلي چې د امنیتي او نورو ستونزو له امله یې نه شوای کولای چې افغان ځواکونو ته د سپارل شویو مرمیو تاییدي رپوټونه ترلاسه کړي. د (ګډ امنیت د انتقال ادارې – افغانستان) له کارکوونکو دا هم ورک دي چې د مرمیو د سپارل کېدو رپوټونه چا ارزیابي کول.
افغان حکومت هم خپلو ځواکونو ته د امریکایانو له لورې د سپارل شویو مهماتو په اړه کره معلومات نه لري.
پر افغانستان باندې د امریکا او نورو هېوادونو له یرغل راهیسې، افغان دولتي سرتېرو باندې شاوخوا ۷۶ میلیارده ډالر لګول شوي دي. امریکا اوس غواړي چې راتلونکی کال شاوخوا ۳،۷ میلیارده نور ډالر د افغان ځواکونو پر تجهیز او مهماتو ولګوي.
ګڼ شمېر امریکايي چارواکو اندېښنه ښودلې چې افغان ځواکونو ته نور ورکول کېدونکي مهمات به هم د پخوانیو په څېر ورک شي او یا به هم د طالبانو لاس ته ولوېږي.
تېر کال ملګرو ملتونو یو ټېم په خپل راپور کې ویلي و چې افغان ځواکونو ته د سپارل شویو ماډرنو وسلو او مهماتو زیاته اندازه د فساد او یا هم په جګړه کې د افغان ځواکونو د ماتې له امله د وسله والو طالبانو لاس ته لوېدلي دي. یاد ټېم په خپل رپوټ کې زیاته کړې وه چې دا پېښې د فساد او جګړو کې د ماتې خوړلو له کبله ورځ په ورځ زیاتېږي.
