طالبان له پیله تراوسه د ځینو ګاونډیو هېوادونو پروژه بلل کېږي. له بده مرغه طالبانو هم دغه تور تراوسه سپین کړی نه دی. ما د ډېرو طالب مشرانو څخه اورېدلي، چې طالبانو په لومړیو کې غوښتل د کندهار د پنجوايي او میوند ولسوالیو خلک د پاټکیانو له ظلمونو خلاص کړي؛ خو وروسته ډېر ولسي ملاتړ ددې سبب شو، چې طالبانو پنځه کاله پر ټول افغانستان واکمني وکړه او د شلمې پېړۍ په پای او د یوویشتمې پېړۍ په لومړیو کې یې بېجوړې حکومتولي وکړه.
دا چې طالبان څنګه خلک دي او خلک وو، دا موضوع اوس ټولو ته روښانه ده. طالبانو په تش لاس د نړۍ اته څلوېښت هېوادونو سره ډغره ووهله او ټول یې په ګونډو کړل.
د کرزي د واکمنۍ یو وزیر راته کیسه کوله، چې په کرزي په ۲۰۰۴ز کال کې د کابینې په غونډه د وخت ښاروال ته دنده وسپارله، چې په کابل کې د طالب مشرانو کورونو او ځایونه معلوم کړي؛ خو د میاشتو هڅو سره ـ سره یې په کابل کې د هېڅ طالب مشر کور پیدا نه کړ. کرزي د کابینې غونډې ته وویل: په درېو کلونو کې تاسې نیم کابل چور کړ او د حکومت عادي مامور هم اوس پاخه کورونه لري؛ خو د طالبانو د پنځه کلنۍ واکمنۍ پرمهال یې یو وزیر هم یوه بسوه ځمکه نه لري.
تېره اوونۍ افغان فزیکپوه او د طالبانو سرسخت مخالف محمد تنها پر خپله مخپاڼه لیکلي وو، چې افغانستان په دومره واکمنانو کې یوازې «اسلامي امارت» اټومي وسلو جوړولو ته پام وکړ او غوښتل یې چې افغانستان هم لکه د سیمې هېوادونو په څېر یو اټوم لرونکی طاقت شي؛ خو له بده مرغه چې واکمني یې امریکايي وحشیانو ړنګه کړه.
دا خبره د تامل وړ ده. ځکه په تېرو شپاړس کلونو کې له افغان حکومت او اردو سره بې درېغه مرستې وشوې او امریکا او ملګري یې ادعا کوي، چې دوی له افغانستان سره ۱۰۶ میلیارده ډالر مرسته کړې، چې زیاته برخه یې په نظامي برخو لګیدلې ده.
خو دلته د جنرال عبدالرحیم وردګ، جنرال بسم الله محمدي، معصوم ستانکزي او عبدالله حبیبي په وخت کې نه اردو پر پښو ودرېده او نه مو اردو د نړۍ په کچه څه کوئ؛ ان د سیمې په کچه هم نه ده روزل شوې، بلکې وزیرانو یې ډېرې پیسې په بډه ووهلې او په بهر کې یې پرې جایدادونه او کاروبارونه راون کړي دي.
که چېرې د طالبانو نظام نه وای ړنګ شوی، نو اوس به موږ مجهزه اردو، یو پرمختللی نظام، له اداري فساده پاک هېواد او د خپلو پولو ساتنه ښه کړی وای. خو له بدهمرغه امریکا او ملګرو یې دغه نظام پر افغانانو نه لورېده او ړنګ یې کړ.
د طالبانو په پنځه کلنه واکمنۍ کې به هېڅوک ثابته نه کړي، چې یو ګاونډی دې یو قدم مخکې راغلی وي؛ خو د امریکا سره د امنیتي تړون سربېره پاکستان، ایران او ترکمنستان سلګونه کیلو مټره مخکې راغلي او د افغانستان خاوره یې اشغال کړې ده.
طالبانو! ملت مو بیا غواړي. خپله مبارزه روانه وساتئ او ملت نور له دې دوه سري حکومت، بېعدالتیو، ناقانینو، ظلمونو، وحشتونو او بمباریو څخه په تنګ راغلی او ستاسې راتګ ته سترګې پر لاره دی. خدای مو راوله.
