امريکا سعودي ته د بالستيک توغنديو ضد سستم ورکوي
(کابل ټکی کام ۱۳۹۶تله ۱۵): د امريکا متحده ايالاتو ويلي، چې سعودي عربستان به د تاد په نوم د بالستيک توغنديو ضد ورکړي.
د امریکا د بهرنیو چارو وزارت وايي، سعودي عربستان به ددغه سیستم په مقابل کې واشنګټن ته ۱۵ میلیارد ډالر ورکوي.
امريکا وايي، په سعودي کې د دغه سستم فعالول به د امريکا امنيت پياوړی او د ایران او نورور سيمه ييزو ګواښونو پر وړاندې به له هغه هېواد سره مرسته وکړي.
امريکا په داسې حال کې دا اعلان کړی، چې روسيې ته د سعودي عربستان د پاچا سلمان بن عبدالعزيز نن درېمه ورځ پوره کېږي او د مسکو سره يې د نورو وسلو سربيره د اس ۴۰۰ دفاعي سستم د رانيولو تړون لاسليک کړ.
دواړو هېوادونو موافقه وکړه، چې په سعودي کې به وسلې توليد کړي او دغه راز د سعودي ځواکونو پر روزنې هم سلا شوې ده.
دغه سستم تر ۲۰۰ کیلومترو پورې رسېدلی او ۱۵۰ کیلومتره لوړ ختلی شي، د تاد په نوم دفاعي سستم د اوږد او نږدې واټن بالستيک توغندي د خپلې الوتنې په وروستي او لومړي پړاو کې له منځه وړلی شي او په ځانګړي ډول د اتومي سروکي لرونکيو توغنديو مخه هم نيولی شي.
امريکا دغه سستم له شمالي کوريا سره د اړيکو له خرابوالي وروسته په سويلي کوريا کې نصب کړ، چې چين يې له نصبولو سره مخالفت څرګند کړی و.
