امریکا: وسلوال برید کې ۲ تنه وژل شوي او یو ټپي دی
(کابل ټکی کام ۱۳۹۶تله ۲۸ فرید افغان)
راپورونه وایي چې د امریکا د کولرادو آیالت کې هغه مهال یوه برید ګر په محصلینو برید وکړ کله چې هغوی خپل درس ته پر لاره و.
د کولرادو آیالت چارواکو رسنیو ته ویلي چې بریدګر د دې آیالت د پوهنتون اړوند محصلین په نښه کړي دي .
پولیسو ویلي چې په برید کې ۲ تنه محصلین وژل شوي او یو بل سخت ټپي دی.
پولیس زیاتوي چې له پیښې وروسته بریدګر هم د پولیسو لخوا وژل شوی دی.
د برید د انګیزې په اړه تر اوسه څه ندي ویل شوي خو ویل کیږي چې یاد بریدګر د نوموړو محصلینو سره تګ راتګ درلود او د خپل منځي مخالفت له امله یې دا چاره تر سره کړې ده.
د یادونې وړ ده چې پدې وروستیو کې د امریکا په مختلفو آیالتونو کې نښتې ډیرې شوې دي چې د شنونکو په وینا ښایي لوی لامل یې په مختلفو هیوادونو کې د امریکایانو پوځي ښکیلتیا د جنګیالیو پام دې هیواد ته اړولی وي.
چې له کبله یې روزانه وسلوال بریدونه او په موټر وهلو پیښې رامنځته کیږي، چې لسګونه تنو ته پکې مرګ ژوبله اوړي.
