مشرانو جرګه: ژر تر ژره باید لویه جرګه راوبلل شي
(کابل ټکی کام ۱۳۹۶ لړم ۱ فرید افغان)
تیره ورځ د مشرانو جرګې غړو د هیواد پر روان وضعیت اندیښنه څرګنده کړه او د مرګونو او لویو حملو لامل یې د امریکا دجګړییزې ستراتیژي تداوم وباله.
مشرانو جرګې وویل چې د امریکا نوې تګلارې اعلان په هیواد کې د جګړې د پراخیدو سبب ګرځیدلې او هیڅ امنیتي وضعیت ورسره ندی ښه شوی.
سناتورانو وویل؛ له حکومت څخه یې د امنیتي وضعیت د ښه کیدلو تمه شلیدلې او د حل یواځنۍ لاره یې د لویې جرګې راغوښتل ښوودلي.
د مشرانو جرګې دوو سناتورانو آصف صدیقي او زلمی زابلي د امریکایي ولسمشر تګلاره چې په جګړییز حل ټینګار کوي، د افغان وژنې جوړه شوې دسیسه بولي او په وینا یې چې ‹‹دا تګلاره نشي کولای په افغانستان کې امنیت ټینګ کړي››
د جرګې نورو غړیو وویل چې د حکومت سیاسي مهار د نورو په لاس کې او له همدې امله ‹‹د هرې ورځې په تېرېدو د جګړې لمن پراخېږي او حکومت یې په پټو سترګو ملاتړ ته دوام ورکوي››
سناتوران له روان وضعيت څخه د راوتو په هدف د حکومت له لوري د لويې جرګې پر نه رابللو نيوکه کوي او له حکومته غواړي چې ژر تر ژره د لويې جرګې اجنډا مشخصه کړي.
د لویي جرګې د راغوښتلو لومړۍ غوښتنه پخواني جمهور رئیس حامد کرزي وکړه چې تر هغه وروسته ورسره ډیرو بنسټونو دا غږ بدرګه کړ.
سناتورانو وویل چې حکومت او امریکایان دواړه د لویې جرګې له تدویر څخه ویره لري.
د دوی په وینا چې افغان حکومت خپله بقا په لویه جرګه کې نه ویني او امریکایان چې د خپلو ګټو په زیان یې بولي مخالفت کوي او نه غواړي چې داسې ملي اجماع رامنځته شي.
