کاپيسا: بمبار کې ۶ ملکي وګړي شهیدان شوي
تېره شپه د کاپيسا ولایت د نجراب ولسوالۍ په افغانیه سیمه کې د بمبار له امله ۶ ملکي وګړي شهیدان شوي دي.
د کاپیسا د والي ویاند، قیس قادري وايي، برید افغان هوايي ځواکونو ترسره کړی دی. قادري وايي چې په وژل شویو ملکي وګړو کې درې ماشومان او ۲ مېرمنې دي.
د والي ویاند وايي، وژل شوې ښځې او ماشومان د طالبانو د یوه قومندان د کورنۍ غړي دي. خو د سیمې اوسېدونکي وايي چې وژل شوي کسان د هېڅ کوم طالب قومندان د کورنۍ غړي نه وو.
د طالبانو وياند، ذبيح الله مجاهد هم ویلي چې بمبار د یوه ملکي وګړي پر کور شوی دی او د کور مشر یې له دوی سره هېڅ اړیکه نه درلوده.
څو ورځې وړاندې هم ګډو ځواکونو په شپنۍ چاپه کې د میدان وردګو په نرخ ولسوالۍ کې د یوې مدرسې ۲۰ زده کوونکي وژلي وو. هغه مهال چارواکو ویل چې په چاپه کې ټول وژل شوي کسان طالبان وو، خو د سیمې خلکو رسنیو ته وویل چې په وژل شویو زده کوونکو کې د زیاترو عمر د ۱۰ او ۱۵ کلنۍ تر منځ و. په همدې ورځ، امریکايي الوتکو د هلمند ولایت په بهرامچه ولسوالۍ کې ۴۴ ولسي وګړي شهیدان کړل.
د ګډ حکومت هېڅ کوم مشر تر دې دمه د بمباریو په اړه غبرګون نه دی ښودلی او نه هم بهرنیو ځواکونو خپله پخوانۍ خبره ”بښنه غواړو!“ کړې ده.
