هلمند: د بهرنيو ځواکونو په بمبارۍ کې ۲۴ پوليس وژل شوي
(کابل ټکی کام، ۱۳۹۶، لین ۲۳) د هلمند د ګرمسير ولسوالۍ اړوند ۲۴ پوليس د کندهار ميوند ولسوالۍ ته څېرمه د بهرنيو ځواکونو په هوايي بريد کې وژل شوي دي.
يوې حکومتي سرچينې پژواک ته ويلي، تېره شپه لسګونه پولیس د کندهار ميوند ولسوالۍ ته د قاچاقبرانو د نيولو په موخه تللي و، چې هلته د وسله والو طالبانو سره په نښته کې وژل شوي دي.
خو د طالبانو وياند قاري يوسف احمدي په خپله رسمي ټويټر پاڼه ليکلي: د هلمند ګرمسير ولسوالۍ کندهار ته څېرمه امريکايي ځواکونو سرحدي پوليس بمبار کړي، چې ګڼ شمير يې وژل شوي دي.
د سرچينې په وينا، پېښه تېره شپه د يادې ولسوالۍ مربوط د ريګي بند تيمور سيمه کې رامنځته شوې ده.
د هلمند يوې امنيتي سرچينې د نوم نه ښودلو په شرط کابل ټکی کام ته وويل، د بهرنيو ځواکونو په هوايي بريدونو کې نږدې شل سرحدي پوليس وژل شوي او يو شمير نور ټپيان دي.
د امنيې قوماندانۍ يوې سرچينې ويلي، په دغه پېښه کې څوارلس پوليس وژل شوي، زياتوي چې یاد سرحدي پوليس د قوماندانانو له لوري په خپلسري توګه سيمې ته استول شوي و.
د هلمند د ولايت مقام په دې اړه له معلوماتو ورکولو ډډه کړې.
