د غزني پوليس وايي، چارواکي يې امتيازات شخصي جېبونو ته اچوي
(کابل ټکی کام، ۱۳۹۶، لیندۍ ۲۶) د غزني ولايت ملي پوليس وايي، چې دوی ته په وخت خوراکي توکي او امتيازات نه ورکول کېږي، ټول يې د چارواکو له لوري شخصي جيبونو ته اچول کېږي.
ازادۍ راډيو د پوليسو له قوله ليکلي: چې د اندړ ولسوالۍ پوليسو ته له تېرو شپږو مياشتو راهيسې جامې، خوراکي توکي او هيڅ ډول اعاشه نه ده ورکول شوې.
د پوليسو په وينا، د دوی پر حقونو دولت سترګې پټوي او امتيازات يې د لوړپوړو چارواکو جېبونو ته ځي.
پوليس وايي، هر کال د ژمي په موسم کې پوليسو ته د يخنۍ وسايل، جامې، د بوټونو رنګ، وريژې، غوړي لوبيا او داسې نور مواد ورکول کېږي خو زياتوي چې دوی له تېرو شپږو مياشتو راهيسې يواځې پټاټې خوري.
د دغه ولسوالۍ اوسېدونکي وايي، پوليسو ته د دولت له لوري نه پاملرنه او هغوی ته په وخت معاشونه نه ورکول پوليس دې ته مجبوروي چې د خلکو پر زورولو لاس پورې کړي، غلاوې وکړي او له سيمه ييزو خلکو په زوره پيسې واخلي.
خو د غزني امنيه قوماندان مل پاسوال محمد زمان د پوليسو دغه ډول ادعا ردوي وايي، هغه څه چې د دولت له لوري دوی ته ورکول کېږي، دوی يې هم بغير له ځنډه پوليسو ته ورکوي.
ويل کېږي، پوليسو ته پر وخت د معاشونو نه ورکول او هغوی ته نه پاملرنه د دې لامل کېږي چې خپلې وسلې او مهمات وپلوري، څو خپل د اړتيا وړ شيان پرې پوره کړي.
تر دې مخکې د يو شمير نورو ولايتونو پوليسو هم ورته شکايتونه درلودل چې په وخت يې جنګي مهمات، جامې او اعاشه نه ورکول کېږي او ډيری امتيازات يې چارواکي خپلو جيبونو ته اچوي.
