په م.م کې د پاکستان استازې: د وسله والو مرکزونه په افغانستان کې دي
(کابل ټکی کام، ۱۳۹۶، مرغومی ۳) په ملګرو ملتونو کې د پاکستان استازې مليحه لودي وايي، د وسله والو مرکزونه او پټنځايونه په پاکستان کې نه، بلکې په افغانستان کې دي.
د سپوټنيک د راپور له مخې، نوموړې ويلي چې د امریکايي چارواکو وروستۍ څرګندونې واقعيت نه لري او د وسله والو پټنځايونه د افغانستان په هغو سيمو کې دي، چې دولت پرې حاکميت نه لري.
افغان دولت او يو شمېر امریکايي چارواکي ادعا کوي، چې پاکستان د طالبانو په ګډون يو شمېر وسله والو ډلو ته په خپله خاوره کې ځای ورکړی، خو مليحه لودي په خپل هېواد کې د وسله والو د پټنځايونو خبره رد کړې زياتوي اوس مهال د افغانستان په څلوېښت سلنه خاوره طالبان او نورې وسله والې ډلې واکمنې دي او همالته يې مرکزونه دي.
څو ورځې وړاندې د امريکا مرستيال ولسمشر مايک پنس په بګرام اډه کې خپلو عسکرو ته د وينا پر مهال پاکستان يو ځل بيا د طالبانو او نورو وسله والو ډلو په ملاتړ او مرستې تورن کړ.
خو په ملګرو ملتونو کې د پاکستان استازې دغه خبرې رد کړي په خبره يې د وسله والو مرکزونه په افغانستان کې دي.
دا په داسې حال کې ده، چې د افغانستان لپاره د امریکايي مرستو د څار اداره «سیګار» وايي افغان حکومت يوازې په ۵۷ سلنه خاوره واکمن دی او پاتې نورې سيمې له طالبانو يا نورو مخالفینو سره دي.
