پاکستان د افغان کډوالو د اوسېدو موده غځوي
(کابل ټکی کام، ۱۳۹۶، مرغومی ۷) پاکستان غواړي، په دغه هېواد کې د افغان کډوالو د پاتې کېدلو موده شپږ مياشتې نوره هم وغځوي.
د پاکستان د سرحدي چارو وزارت يوې سرچينې امريکا غږ ته ويلي، په دې اړه يې حکومت ته يو وړانديز استولی او تمه ده چې په راتلونکو ورځو کې به وروستۍ فيصله وکړي.
د پخوانۍ هوکړې له مخې، د درې ورځو په تېرېدو سره د دسمبر په ۳۱ نېټه په دغه هیواد کې د افغان کډوالو د اوسېدو قانوني نېټه پای ته رسېږي.
د پاکستان حکومت تر اوسه د افغان کډوالو د اوسېدو مودې غځولو رسمي اعلان نه دی کړی.
د پاکستان حکومت وايي، په دغه هېواد کې نږدې ديارلس لکه ثبت او اووه لکه ناثبت افغان کډوال استوګنه کوي.
په دې وروستيو کې د ملګرو ملتونو ادارې په مرسته پاکستان حکومت د غير قانوني افغان کډوالو د ثبتولو لړۍ پيل کړې، چې لا هم روانه ده.
