غزني: طالبانو په مرکز کې یوه پوسته نیولې اوګڼو عسکرو ته یې مرګ ژوبله اړولې
(کابل ټکی کام ۱۳۹۶ مرغومی ۷ فرید افغان)
د غزنې د والي ویاند رسنیو ته ویلي چې تیره شپه طالبانو د دې ولایت د مرکز اړوند په ‹‹خشک›› سیمه کې پر امنیتي ځواکونو برید ترسره کړی چې یو شمیر بولیسو ته یې مرګ ژوبله اړولې.
ویاند ویلي په دې برید کې د دوی ۳ پولیس وژل شوي او ۲ تنه یې ټپیان دي.
بل پلو په ملي شورا کې د غزني استازي وایی چې د طالبانو په برید کې ۶ پولیس وژل شوي او پوسته هم د طالبانو لاسته لویدلې
د غزنې د امنیې قوماندان محمد زمان هم نښته تایدوي خو د پوستې د سقوط په هکله یې له څه ویلو ډډه کړې.
طالبانو دپیښې مسؤلیت منلی او ویاند یې ویلي چې تیره شپه یې د غزني مرکز اړوند خاک غربیان سیمه کې یوه پوسته نیولې او هلته میشت ۸ عسکر یې وژلي
طالبانو همداراز په خشک سیمه کې هم نښته منلې او ویلي یې دي چې هلته یې د امنیتي ځواکونو ۲ ټانګونه له منځه وړي او ۵ عسکر یې وژلي او همداراز یې نن سهار په روضه سیمه کې د ۴ عسکرو د وژلو خبر ورکړی دی.
دا نښتې داسې مهال رامنځته کیږي چې د غزني چارواکو په دې ولایت کې د پیل شویو عملیاتو د پرمختګ خبر ورکړی او په قره باغ ولسوالۍ کې یې ګڼو طالبانو ته د مرګ ژوبلې اړولو ادعا کړې هغه څه چې طالبان یې نه مني او افواهات یې بولي
