هلمند او ننګرهار کې دولس ملکي وګړو ته مرګ ژوبله اوښتې
(کابل ټکی کام، ۱۳۹۶، مرغومی ۱۳) د ننګرهار ولايت په غني خيلو او د هلمند ولايت په واشير ولسوالۍ کې دولس ملکي وګړو ته مرګ ژوبله اوښتې ده.
لومړنۍ پېښه په غني خېلو ولسوالۍ کې د هاوان مرمۍ د لګېدو له کبله رامنځته شوې ده، چې په ترڅ کې يې د يوې کورنۍ يو کس وژل شوی او پنځه تنه نور ټپيان دي.
يوې امنيتي سرچينې کابل ټکی کام ته وويل، دغه هاوان مرمۍ د امنيتي ځواکونو له لوري وار شوې ده.
د ننګرهار د والي وياند وايي، نن دوه بجې ځانګړو ځواکونو د يادې ولسوالۍ مربوط د ۲۷ ويالې په سيمه کې عمليات کړي، زياتوي چې په سيمه کې ملکي خلکو ته مرګ ژوبله اوښتې ده.
وخت ناوخت د امنيتي ځواکونو د هاوان او لويو توپونو بریدونو کې ملکي خلکو ته مرګ ژوبلې اوړي، چې امنیتي مسئولين يې پړې پر وسله والو طالبانو اچوي.
له بله پلوه د هلمند د والي وياند عمر ځواک رسنيو ته ويلي، چې نن له غرمې وروسته د واشير ولسوالۍ په سنګينلام سيمه کې د ملکي وګړو پر سراچه موټر د ماين چاودنه شوې، په ترڅ کې يې دوه ملکي وګړي وژل شوي او څلور نور ټپيان دي.
د دواړو پېښو مسئوليت تر اوسه چا په غاړه نه دی اخيستی.
