د ولسي جرګې غړو دتنخواو او امتیازاتو د زیاتوالي غوښتنه وکړه
(کابل ټکی کام ۱۳۹۶ مرغومی ۱۶ فرید افغان)
په هغه مکتوب کې چې د رسنیو لاس ته لویدلی د ولسي جرګې غړو له حکومتي چارواکو غوښتي تر څو د دوی امتیازات دوه چنده شي.
په دې لیک کې د بودیجې او مالي کمیسیون نه غوښتل شوي چې د جرګې د وکیلانو امتیازات او میاشتنۍ تنخوا یې دوه برابره شي او همداراز ورته یو شهرک هم ورغول شي.
سره له دې چې د ولسي جرګې غړي اوس هم ۲۰۰ زره افغانۍ میاشتنۍ تنخواوې لري، غوښتي چې دا حساب باید نور هم لوړ شي.
په یاد مکتوب کې یوه میاشت وړاندې د ملت استازو له حکومت غوښتي ترڅو له ۴۵۰۰۰ افغانیو نیولې تر ۹۰۰۰۰ افغانیو پورې امتیازي معاش ورکړل شي.
همداراز؛ د کردیت کارتونه چې پخوا ورته ۵۰۰۰ افغانۍ ورکول کیدل اوس باید ۱۰ زرو افغانیو ته لوړ شي.
د تیلو پیسې چې تر دې وړاندې ۱۰ زره افغانۍ ورکول کیدې اوس باید ۲۰ زرو افغانیو ته لوړې شي.
همداراز غوښتل شوي تر څو د ولسي جرګې د دارالانشا برخه پراخه شي، یو رهایشي کمپلکس، د وکیلانو او کارمندانو د ظرفیت لوړوالی اوپارلمان ته د لمریزې بریښنا پروژه باید ورغول شي.
همداراز غوښتل شوي چې مرستیالانو، موتر چلوونکو، او ساتونکو ته یې ۲۵ زره افغانۍ تنخوا اضافه شي.
په دې سربیره د دارالانشاء رسمي مامورانو ته له ۵۰۰۰ افغانیو نیولې تر ۲۵ زرو افغانیو د تنخواو زیاتوالی غوښتل شوی.
په امنیتي برخه کې د کارمندانو تنخوا باید له ۲۰۰۰ څخه تر ۴۰۰۰ پورې ډیره شي.
همداراز سل میلونه افغانۍ باید د ولسي جرګې د دارالانشاء قراردادي مامورینو په بودیجه کې زیاتې شي.
دا په داسې حال کې ده چې، دوه ورځې وړاندې د روڼتیا ادارې ویلي و چې د ولسي جرګې وکیلانو په تیرو ۹ کلونو کې ۱۳ ځله بودیجه د خپلو شخصي منافعو په خاطر رد کړې ده.
دا یواځې ولسي جرګه نه ده چې د دولت له بودیجې په هسکه غاړه د مالي فساد غوښتنه کوي بلکې څو ورځې وړاندې همدې جرګې ارګ هم د ۷۰۰۰ کارکونکو په درلودلو سره تورن کړی و، چې میلیاردونه افغانۍ بودیجه یواځې د خپلو زرګونو کارمندانومعاشات ورکوي.
د رسنیو د راپورونو پر اساس له دسترخوان او اعاشې پرته د ولسمشر د سلاکارانو میاشتنۍ تنخوا تر ۱۷ میلیون افغانیو ډیره ده.
چې یواځې د ولسمشر د ۴۸۴ تنو سلاکارانو کلني معاشات له ۲۰۰ میلیون افغانیو اوړي.
همداراز د ولسمشر د میرمنې ‹‹رولاغني ›› د دفتر میاشتنۍ تنخوا دوه میلون دالر ده چې په اوسط ډول دکال تر شل میلیون دالرو ډیرې پیسې ترلاسه کوي.