(کابل ټکی کام، ۱۳۹۶، مرغومی ۱۶) د کابل ښاريان د جنايي پېښو، غلاوو انسان تښتونو او قتلونو د زياتېدو له کبله اندېښمن دي وايي، چې د غلاوو لوی لامل په هېواد کې بېکاري او اوزګارتيا ده، چې ډیری ځوانان يې جنايي جرمونو ته اړ کړي دي.
د کابل ښار يو تن اوسېدونکی عبيدالله وايي، په هېواد کې د غله او دولت تر منځ اړيکې دي چې له امله يې په جنايي پېښو کې زياتوالی راغلی دی.
د ښار يو بل اوسېدونکی رياض ګل بيا وايي، د غلاوو سربېره د انسانانو ژوند هم له خطر سره مخ دی او لامل يې د قانون نه پلي کېدل بلي، زياتوي چې ډیری زورواکان او ځينې دولتي کړۍ له دوی ملاتړ کوي او هغوی ته د غلاوو او انسان تښتوونو زمينه برابروي.
دغه راز د کابل يو شمير نور ښاريان شک څرګندوني وايي، په حوزو کې دې هغه کسان له دندو ليرې شي،چې پخوا پاتې شوي وايي چې نويو ځوانانو ته دې دندې ورکړي، څو وکولای شي د جنايي جرمونو مخنيوی په سم ډول وشي.
په کابل، جلال اباد او د هېواد په يو شمېر نورو لويو ښارونو کې په دې وروستيو کې امنيتي وضعيت خراب شوی، چې ډیری پانګوال يې د هېواد پرېښودو ته اړ کړي دي.
شاوخوا دوه مياشتې مخکې د مشرانو جرګې د کورني امنیت او دفاعي چارو د کمېسيون مشر محمد هاشم الکوزي ويلي و، چې په کابل ښار کې نږدې ۴۵ زره غير مسووله وسله وال د امنيتي يونيفورم نه په استفادې وسلې ګرځوي، چې زياتره د چارواکو په ملاتړ انسان تښتونې، غلاوې او قتلونه کوي.
