(کابل ټکی کام ۱۳۹۶ مرغومی ۱۶ فرید افغان)
تر ۶ جنجالي غونډو وروسته ولسي جرګه لا هم په تذکرو کې د افغان کلیمه نه مني او حکومت ته د هیواد پر تجزیې ګواښونه کوي
څو ورځې کیږي چې ولسي جرګه کې د قومي تفرقې ګواښوونکې خبرې کیږي خو په اړه یې حکومت چوپه خوله دی.
په جرګه کې دوه ډلې لاس اوګریوان دي لمړۍ هغه چې په تذکرو کې د افغان کلمې د زیاتولو ملاتړي دي، اوبله هغه ده چې نه یې مني.
مخکینیو غونډو کې بحثونه په کنایي او احترامانه توګه ترسره کیدل خو اوس دا هرڅه ختم دي او یواځې ترخې او تندې خبرې تبادله کیږي.
د ولسي جرګې اداري هیئت هڅه کوي چې دابحثونه کنترول کړي خو دا چې اوضاع یې له کنترول وتلې نشي کولی.
د ولسي جرګې غړی ظهیر سعادت وایي، ملي یووالی دې په عمل کې پیاده شي په زور سره د چا امرونه نه منو.
د ده په خبره ‹‹د نفوسو داحولو ثبت ریاست مو ویشي او په قومونو مو تقسیموي››
اسدالله سعادتي وویل؛ په نړۍ کې که هرڅومره سخته مسئله راشي حل لاره ورته پیدا کوي او په وینا یې چې ‹‹ یا دې د افغان کلمه راته نه لیکل کیږي یا به تجزیه کیږو او خپلواکي اعلانوو یواځې افغانستان زغموو اوبس››
بل پلو بیا د ولسي جرګې غړی او سیاسي شناند کمال ناصر اصولي وایي؛ دنظر اختلاف منو خو دا اختلاف له اساسي قانون سره ښکاره ټکر لري.
نوموړي له اداري هیئت نه وغوښتل چې د هغو خلکو چې د اساسي قانون پر خلاف خبرې کوي مخه ونیسي .
راضیه سعادت منګل بیا وایي؛ د نفوسو د احوالو د ثبت قانون د ولسي او مشرانو جرګو ګډې کمیټې تصویب، ولسمشر توشیح او اوس نافذ شمیرل کیږي داډول نظریات هسې انرژي بې ځایه صرف کول دي.
د دې په خبره ‹‹ که ځینې ګیدړان غواړي له دې قانون څخه په استفادې زمریو ته دوکه ورکړي، نو پوی دې شي چې په افغانستان کې زمري معلوم دي››
خو د نوموړې د ترخو خبرو په ځواب کې داود پیمان وویل چې ‹‹دزور خبرې مه کوئ په قانون وغږیږی ››
ځینو استازو د اداري هیئت په بې پرې توب هم نیوکه کوله چې په وینا یې په لوی لاس اختلافي موضوعاتو ته لمن وهي.
دوی وایي چې؛ اداري هیئت له یوې میاشتې راهیسې بې طرفي نه لحاظ کوي او دجرګې د ګډونوالو پریکړو ته په نه کتلو په خپله خوښه د ویناوو جمع بندي کوي.
خو عبدالستار درزابي په اوښلنو سترګو په ژړا کې له حکومت څخه وغوښتل چې تعصب او تبعیض ته دې د پای ټکی کیږدي.
د ده په خبره د کابل ښار په ۱۸ زره پولیسو کې ۳ تنه د ازبک، ترکمن او ایماق له قبیلو موجود و، چې هغوی هم د کوم مشر په نشتون سره له پولیسي وشړل شول.
داچې د ولسي جرګې غونډې ورځ تربلې د تربګنۍ بوی اخلي داسې ښکاري چې په دې مسئله کې هم د نورو مسائلو په څیر لوی دولتونه تمویلیدونکی رول لري
