د نیما انسټیټیوټ کې د نجونو او هلکانو د لیلیې لپاره جوړې دوه ودانۍ پرانیستل شوې

کابل ټکی کام ۱۰لېندۍ/۱۳۹۴، احمدالله مهاجر
د نیما انسټيټوټ په انګړ کې د نجونو او هلکانو لپاره د لیلیې د دوو جوړو شویو ودانیو په یوه غونډه کې پرانیستل شوې.
په دغه غونډه کې د پوهنې وزیر اسدالله له نړیوال بانک څخه په مننه وویل چې دوی د دغو پروژو مالي لګښت ورکړی دی.
اسدالله له نړیوالو بنسټونو څخه غوښتنه وکړه چې د افغانستان د ښوونیزو مرکزونو د کمیتې او کیفیتي ودې په موخه خپلو مرستو ته دوام ورکړي.
د پوهنې وزیر همدا راز له زدکوونکو څخه وغوښتل تر څو د نویو ودانیو د وسایلو او تجهیزاتو ساتنې ته په پوره ډول پاملرنه وکړي.
د نیما انسټيټيوټ د لیلیې یادې دوې ودانۍ په دریو پوړونو کې په پاخه او اساسي توګه په څه د پاسه ۷زره مربع متره ځمکه باندې جوړې شوي دي.
د دغې ودانۍ ټول مالي لګښت ۱۴۳میلیونه افغانۍ دی، چې د نړیوال بانک له خوا ورکړل شوی دی.
په دغه ودانۍ کې پر یو وخت ۲۰۰ کسان اوسېدی شي.