تبصره
د ولسي جرګې وکيلانو د ١٣٩٧ کال لپاره له حکومته غوښتي چې د دوی اميتازات دې په نوې بودجه کې دوه برابره کړي. هغه مکتوب چې رسنيو ته په لاس ورغلی، ترې څرګندېږي چې که د وکیلانو غوښتنه ومنل شي، د يوه وکيل مياشتني امتيازات به ٩٠ زرو افغانيو ته ورسېږي، چې پکې د وکيل د کور کرايه، د موبايل (ګرځنده) کريډيټ کارډونه، د موټرو د تېلو لګښت، او … شامل دي، تر اوسه لا د وکیلانو غوښتنې ته د هو او نه ځواب نه دى ورکړل شوى.
که د ولسي جرګې وکيلان دا ډول امتيازات ترلاسه کړي نو په حکومت کې به – بې له قاضيانو او څارنوالانو – پوليس، معلمين او نور کارمندان د پولۍ تړک ته کښېني. د ولسي جرګې وکيلان به د حکومت بودجه يرغمل کړي او د بل حکومتي مامور معاش به په بند معاش اعلان شي.
په هېواد کې د نورو ناانډوليو د له منځه وړلو لپاره د ولس سترګې ولسي جرګې ته اوړي چې د ستونزو په حل کې به یې قدمونه پورته کړي، خو ولسي جرګې د هغه څه غوښتنه وکړه چې په منلو سره به یې د ولس ستونزې لس چنده زياتې شي.
دا مهال د هېواد تر دوه نيم مليونه زيات وګړي په لوږه ويده کېږي، د هېواد پينځه اويا سلنه وګړي بې کاره ګرځي، له هېواده پنځه ويشت سلنه ځوانانو د اروپايي هېوادونو په لور پښې وایستې – ورځ په ورځ د دې خوار ولس او چاغې ولسې جرګې د وکيلانو د کړنو له امله د ولس ژوند تريخېږي.
هر هېواد چې د نوي کال لپاره بودجه منظوروي، لومړی پکې د هېواد د فاع، روغتيا، ښوونې او روزنې او … برخو ته پاملرنه کېږي، نه دا چې لومړي سر کې دې د چاغو وکيلانو د لا چاغښت لپاره امتيازات دوه برابره زيات کړل شي.
د همدې ولس له منځه او په ولسي رايو، دې وکيلانو ولسي جرګې ته لار کړې ده او په بل اړخ کې، د همدې ولس له منځه پوليس په واورين ژمي کې، په خپلو پوستو کې، په لړزېدلو ژامو د یو ناروا او پردي هدف د پوره کولو لپاره شپې سبا کوي. هغوی ته حکومت (دفاع وزارت) خوراک نه شي رسولاى او وکيلان دې غوښن متيازات غواړي.
د تخار ځايي پوليسو ته د شپږو مياشتو راپدېخوا خوراکي توکې نه دي رسېدلي او آن وچه ډوډۍ هم ورته نه ورکول کېږي. پر کومه پوسته چې د جګړې پر مهال پوليسو ته د تيښتې چانس برابر شي، بيا حکومت پوليس ملامتوي چې طالب وسله والو ته تسليم شوي دي.
فرانسوي روزنيزو نظامي استادانو چې په افغستان کې د بن د موافقې په اساس درې نيم لکه روزل شوى افغان پوځ پوره نه کړای شو، هغه وخت د فرانسوي استادانو د افغان پوځ د کم شمېر په اړه دليل دا و چې تر روزنې لاندې د افغان ځوانانو تعليمي کچه ټيټه او زياته برخه نوي ځوانان یې په نشه يي توکو روږدي دي. وروسته دپوليسو په اړه دفاع وزارت وويل چې طالب وسله والو په پوليسو کې نفوذ کړی دی.
اوس پوليسو ته خوراکي توکي نه رسېږي. د تخار پوليس هم د نورستان د پوليسو په څېر د خوراکي توکو د نشتوالي له امله په نرۍ لوږه شپې سبا کوي، خو د ولسي جرګې وکيلان یې د لا چاغښت لپاره د راتلونکي کال په بودجه کې دوه برابره امتيازات غواړي.
