(کابل ټکی کام، ۱۳۹۶، مرغومی ۱۹) د روسيې د دفاع وزارت وايي، ديارلس بې پيلوټه الوتکو د سوريې پر حميم او طرطوس هوايي اډو بريدونه کړي، خو مرګ ژوبله يې نه ده اړولې.
د دفاع وزارت په اعلاميه کې راغلي، روسي ځواکونو د دغو الوتکو د بريدونو مخه نيولې او د زګنالونو له لارې يې د ځينو بې پيلوټه الوتکو کنترول په خپل لاس کې واخيست.
اعلاميه زياتوي، ځينې الوتکې د زګنالونو له لارې کنترول شوې او نورې يې د S-1 الوتکو ضد توغندي سيستم په واسطه له منځه يوړل شوې.
تر اوسه د دغې الوتکو د بريدونو په اړه کومې ډلې څه نه دي ويلي او روسيې هم په چا دا تور نه دی لګولی.
خو د اسوشیټېډ پرس خبري اژانس د راپور له مخې د جنورۍ په اتمه نېټه بریتانيا مېشتې د سوريې د بشري حقونو د څار ادارې ويلي و چې دغه بريدونه د سوريې د مخالفو وسله والو له لوري ترسره شوي دي.
روسیه او ايران په سوريه کې د بشار الاسد د حکومت ملاتړ کوي او د هغه په طرفدارۍ جګړه مخته وړي، خو ځينې پوځي شنونکي بيا وايي، چې امریکا په دغه هېواد کې د یو شمېر وسله والو ډلو ملاتړ کوي.
د سوريې د شپږ کلنې کورنۍ جګړې په ترڅ کې تر دې دمه سلګونه زره کسان وژل شوي او میلیونونه نور خپلو کورو پرېښودو ته اړ شوي دي.
په دغې جګړه کې د پاکستانيانو سربيره لسګونه زره شيعه مذهبه افغانانو هم برخه اخيستې چې د وروستيو شمېرو له مخې په دې جګړه کې دوه زره افغانانو خپل ژوند له لاسه ورکړی او اته زره نور ټپيان شوي دي.
