(کابل ټکی کام، ۱۳۹۶، مرغومی ۲۱) د کندز امنيتي مسئولین وايي، د دغه ولايت په دشت ارچي ولسوالۍ کې د طالبانو په بريد کې پنځه پوليس وژل شوي دي.
د کندز امنيه قوماندان مل پاسوال عبدالحميد حميدي رسنيو ته ويلي، تېره شپه د يادې ولسوالۍ په محب الله کلي کې طالبانو په امنيتي پوسته بريد کړی، په ترڅ کې يې پنځه پوليس وژل شوي دي.
نوموړی وايي، په بريد کې طالبانو ته هم مرګ ژوبله اوښتې خو په اړه يې کره معلومات نه لري.
دشت ارچي د کندز شمال ختيځ کې پرته ولسوالۍ ده چې ډيری سيمې يې د طالبانو تر واک لاندې دي.
طالبانو تر اوسه د دې بريد په اړه څه نه دي ويلي.
له بله پلوه د بغلان د نهرين ولسوالۍ د پوليسو قوماندان سيد محمود سادات وايي، نامعلومه وسله والو د دغې ولسوالۍ په مربوطاتو کې د پوليسو په يوه پوسته بريد کړی، چې پر مهال يې درې پوليس وژل شوي او د هغوی وسلې بريدکوونکو له ځآن سره وړي دي.
طالبانو د دغې بريد مسئوليت منلی او په يوه خبرپاڼه کې يې ويلي، چې د نهرين ولسوالۍ اړوند شکرک زار سيمه کې د لويې لارې په پرتې پوسته يې بريد کړی، درې سيمه ييز پوليس وژل شوي او وسلې يې طالبانو له ځآن سره وړي دي.
