(کابل ټکی کام ۱۳۹۶ مرغومی۲۵ فرید افغان)
طالبانو رسنیو ته په یوه استول شوې خبرپاڼه کې ویلي چې د ‹‹استشهادي کنډکونو او نظامي معسکرونو ›› کمیسون یې د هیواد په مختلفو سیمو کې ۶۰۰ کسانو ته پوځي روزنه ورکړې.
طالبانو ویلي، دې کسانو لوړه نظامي روزنه ترلاسه کړې او په فکري، نظامي، تخنیکي او نورو مختلفو دورو کې له دندو فارغ شوي دي.
خبرپاڼه زیاتوي‹‹ یادو کسانو د شپته ورځنیو دورو په ترڅ کې د اسلامي عقيدې، حنفي فقهې، نبوي سيرت، دعوت، استخباراتو، د نړیوالي نقشي، درنو او سپکو وسلو، نایټ ویژن او لیزري دوربینونو، جګړیزو تکتیکونو او عسکري حرکتونو، او هر راز فوځي روزني په برخو کې ضروري او مهمې زده کړې تر لاسه کړي دي››
طالبانو ویلي چې فارغ شوي ځواکونه یې په لوړ مرال روزلي او سملاسي به د بهرنیو ځواکونو او دهغوی د ملاتړو پرضد جګړو ته ستانه شي.
طالبانو همداراز ویلي چې فارغ شوي کسان یې د باتجربه، او مسلکي استادانو لخوا د شپنیو او ورځنیو چاپو، نفوذيې، تصفیوي، او تعرضي عملیاتو په برخو کي هم روزل شویدي، او په خبره یې چې کولی شي‹‹ دالله جل جلاله په نصرت په ورښودل شوي تکتیک هر راز محاصره ماته کړای شي››
طالبانو دوه کاله وړاندې د خپلو ځواکونو دروزلو په موخه په هیواد کې دننه د نظامي زدکړو روزنځایونه رامنځته کړل چې زرګونو تنو طالبانو ته یې نظامي روزنه ورکړې او یواځې د سږکال په اوګدو کې یې تر ۳۰۰۰ ډیر کسان روزلي دي.
یاد کمیسون د هیواد په مختلفو ولایتونو کې طالبان روزي.
طالبانو ویلي چې د یاد معسکر اداري تشکیل پر 450 تنو علماوو او نظامي کارپوهانو باندې مشتمل دی، چې په شرعي، نظامي، عسکري، تخنیکي او استخباراتي برخو کې مجاهدينو ته روزنه ورکوي
