(کابل ټکی کام، ۱۳۹۶، مرغومی ۲۵) د فراه ولايت چارواکي وايي، د دغه ولايت په بېلابېلو سيمو کې اته پوليس وژل شوي او څلور تنه نور ټپيان دي.
د فراه د امنيې قومندانۍ د امنيت امر ګلبهار مجاهد اريانا نيوز ته وويل: طالبانو تېره شپه د ښار په دوو امنيتي کمربندونو بريدونه کړي او ياده مرګ ژوبله يې اړولې ده.
په عين حال کې د ولايتي شورا غړې جميله اميني وايي، طالبانو د فراه په مرکز کې د ريګي په نوم په امنيتي پوسته بريد کړی، په ترڅ کې يې پنځه عسکر وژل شوي او د هغوی وسلې او نور مهمات طالبانو له ځآن سره وړي دي.
هغې زياته کړه، سيمې ته د کومکي عسکرو په رسېدلو طالبانو دوباره بريد وکړ چې په پایله کې يې د پوليسو دوه قومندانان وژل شوي دي.
طالبانو د برید مسئوليت په غاړه اخيستی او کابل ټکی کام ته يې په رالېږلې خبرپاڼه کې ويلي، په دوهمه امنيتي حوزه کې يې د دولتي ځواکونو يوه پوسته نيولې د قومندان توفيق په ګډون پنځه پوليس وژل شوي او دوه نور ټپيان دي.
طالبان وايي، په پوسته کې يوه رينجر او پوسته سوځول شوې او په پايله کې يې اووه ميله وسلې او په زياته اندازه پوځي توکي هم نيولي دي.
دا په داسې حال کې ده، چې تېره ورځ هم طالبانو د فراه ښار په دوهمه امنيتي حوزه کې په يوه پوسته د بريد خبر ورکړی و، چې په وينا يې څلور پوليس پکې وژل شوي او دوه تنه نور ټپيان دي.
په دې وروستيو کې په دولتي پوستو او امنیتي مرکزونو د طالبانو بريدونه زيات شوي دي.
