اشرف غني: که د امریکا ملاتړ نه وي، افغان پوځ ۶ میاشتې هم مقاومت نه شي کولای

ولسمشر اشرف غني د امریکا له CBS News ټلوېزني چېنل سره په مرکه کې ویلي چې خپلې ټولې هیلې یې د امریکا تر مالي ملاتړ پورې تړلې دي؛ که د هغوی مرسته نه وي اداره او پوځ یې تر نیم کال پورې له منځه ځي.

غني د خبریال د دې خبرېپه ځواب کې چې ”ویل کېږي، که امریکا له افغانستانه ووته، ستاسو حکومت به په ۳ ورځو کې ړنګ شي،“ وویل، ”هو، دا خبره سمه ده. ځکه موږ مالي سرچینې نه لرو او د امریکا له مرستو پرته مو اردو پوره ۶ میاشتې هم دوام نه شي کولای“.

غني زیاته کړه چې حکومت یې یواځې مالي مرستو ته تږی دی او په وینا یې چې د جنګ په مخته وړلو کې د بل هېواد مرستو ته اړتیا نه لري.

غني همداراز وویل، که په هېواد کې ثبات او امنیت رانشي، ښایي دا جګړه تر څو نسلونو دوام وکړي.

غني اعتراف کړی چې د افغانستان جګړه ورځ تر بلې سخت پړاو ته داخلېږي او هره ورځ لسګونه افغان سرتېري په جګړو کې وژل کېږي.

غني داسې مهال دا ناهیلي ښکاره کوي چې د مالیې وزیر څو ورځې وړاندې ویلي و چې امریکا تر ۲۰۲۰ کال وروسته پیسې نه ورکوي.

غني تر دې وړاندې ویلي و چې دوی په افغانستان کې د امریکا دګټو د تحفظ لپاره ګمارل شوي عسکر دي او د نړیوالو د امنیت لپاره روانه جګړه مخته وړي.

باید وویل شي چې امریکا افغان پوځ ته په کلنۍ توګه ۴ میلیارد ډالر ورکوي چې د پوځ ۹۰ سلنه لګښتونه جوړوي.

د یادونې وړ ده چې امریکایي ولسمشر ویلي چې تر دې وروسته به د افغان جګړې لګښتونه د افغانستان له زېرمو پوره کوي او په همدې توګه به خپل مخ پر زوړ اقتصاد هم ورغوي.