(کابل ټکی کام، ۱۳۹۶، مرغومی ۲۶) د سولې عالي شورا د دارالانشاء رييس اکرم خپلواک په تازه څرګندونو کې ويلي، چې حکومت له طالبانو سره د سولې لپاره ټينګه اراده نه لري.
نوموړي وويل: افغان حکومت لا هم له طالبانو سره مخامخ خبرو ته نه دی ورګډ شوی او زياته يې کړه چې طالبانو هم تر دې دمه د سولې لپاره پوره تياری نه دی ښودلی.
هغه دغه راز، د جګړې له ښکېلو خواوو د ډزبندۍ غوښتنه وکړه او ويې ويل چې دواړه غاړې دې د بين الافغاني سولې لپاره په خپلو کې خبرې پيل کړي.
اکرم خپلواک ځينې سيمه ييز هېوادونه او په ځانګړي ډول پاکستان تورن کړل چې له طالبانو سره د سولې په برخه کې خنډونه رامنځته کوي او په دې برخه کې ښکاره لاسوهنې کوي.
دا لومړی ځل نه دی چې پر حکومت د سولې اړوند نيوکه کېږي، بلکې تر دې مخکې هم يو شمير کارپوهانو، ځينو ادارو او سياسي شنونکو اوسنی حکومت ملامت کړی چې د سولې لپاره کلکه اراده نه لري او غولونکې ناستې ترسره کوي.
څه موده مخکې په افغانستان کې د سيمه ييزو او ستراتيژيکو مطالعاتو مرکز د يوې ټولپوښتنې په پايله کې ويلي و، چې ۶۷سلنه خلک پر دې باوري دي چې حکومت د سولې لپاره قوي اراده او هوډ نه لري.
د دغه مرکز مشر دوکتور عبدالباقي امين ويلي و د سولې شورا اړوند ويلي و، چې دل يواځې نمايشي شورا ده او تر دې دمه يې د سولې په برخه کې هيڅ ډول پرمختګ نه دی کړی، ځکه د ټولپوښتنې له مخې اويا سلنه خلک د سولې په برخه کې حکومت په خنډونو جوړولو ملامت بولي.
دا په داسې حال کې ده، چې وړمه ورځ داسې راپورونه ورکول شول ګنې د طالبانو او حکومت استازي د حزب اسلامي په منځګړيتوب په ترکيه کې د سولې اړوند غونډه لري.
خو طالبانو دغه خبرې رد کړې او په يوه خبرپاڼه کې يې وويل: چې د ترکيې غونډه کې د دوی کوم استازی ګډون نه لري.
طالبان وايي: اسلامي امارت واضح اجنډا لري چې هغه د اشغال خاتمه او په هیواد کې د افغان شموله اسلامي نظام راوستل دي.
